Ötən il universitetin prorektoru Qorxmaz Ağayevin həbsindən sonra tələbələrdən rüşvət yığımı dayandırılsa da, rektor yenidən müəllimlərə “başla” əmrini verib... Lənkəran Dövlət Universitetinin bir qrup tələbəsi bu ali təhsil ocağında baş alıb gedən rüşvətlə bağlı şikayət ərizəsi göndəriblər. AZXEBER.COM-un elektron ünvanına göndərilən həmin məktubda universitet rektoru Asəf İsgəndərovun bir il bundan öncə rüşvət aldığı yerdə həbs edilən prorektor Qorxmaz Ağayevdən sonra yenidən universitetdə rüşvət yığımına “başla” əmri verdiyi qeyd olunub. Tələbələr Qorxmaz Ağayevin həbsindən sonra bir müddət universitetdə rüşvətin yığışdırıldığını desələr də, daha sonra rektorun yenidən bütün müəllimlərə rüşvət yığılması ilə bağlı tapşırıqlar verdiyini yazıblar: “Lənkəran Dövlət Universitetində açıq bazar elan olunub. Keçən il prorektor Qorxmaz Ağayevin rüşvətə görə həbs olunmasından sonra universitetdə pul yığımına son qoyulmuşdu. Düzdür buna baxmayaraq, müəllimlər gizli də olsa rüşvət alırdılar. İndi Universitet əvvəlki vəziyyətinə geri dönür. Yəni universitetdə yığılan rüşvət rektor, prorektor, dekan və müəllimlər arasında bölünür. İmtahanların qiyməti isə 30- 40 manat arası dəyişir. Rektor Asəf İsgəndərov universiteti əvvəlki korrupsiya bataqlığına geri döndərdib. Bu universiteti tez-tez “elm ocağı” adlandırırlar. Mən deyərdim ki, bura yalnız rüşvət yığmaq üçün istifadə edilən bir müəssəsədir. Lənkəran Dövlət Universitetində təhsillə bağlı heç bir iş görülmür. Bizə burada yalnız rüşvət yığmağın qaydaları öyrədilir”. Xatırladaq ki, ötən il sözügedən universitetin rektoru Asəf İsgəndərovun köməkçisi Qorxmaz Ağayev Azərbaycan Baş prokuroru yanında Korrupsiyaya Qarşı Mübarizə İdarəsi əməkdaşları tərəfindən rüşvət alan yerdə həbs edilmişdi. Bundan bir neçə il öncə - 2011 – ci ilin avqust ayında isə Lənkəran Dövlət Universitetinin rektor köməkçisi Emin Şəhzadə fırıldaqçılıqla məşğul olduğuna görə həbs olunmuşdu. Saxlanılan şəxs ayrı-ayrı vətəndaşları Lənkəran Dövlət Universitetinə və digər dövlət qurumlarına işə düzəltmək adı ilə 16 min manat pul alaraq aldatmışdı. Ümumilikdə 2007-ci ildən dəfələrlə universitetdəki rüşvət halları ilə bağlı mətbuatda silsilə yazılar dərc olunur. AZXEBER.COM portalı olaraq ötən il rüşvət aldığı yerdə Korrupsiyaya Qarşı Mübarizə İdarəsi əməkdaşları tərəfindən həbs edilən sözügedən universitetin prorektoru Qorxmaz Ağayevin həbs edildiyi anları yenidən təqdim edir. | 
