Ötən həftə şəhərin Rustavi küçəsində, İnşaatçılar qəsəbəsi ərazisində bədbəxt hadisə baş verdi.
Yerin, daha doğrusu, səkinin çökməsi 3 şəhər sakininin çökmüş dəliyə düşərək bədən xəsarətləri almasına səbəb oldu. Artıq bir həftədən çoxdur ki, ərazidə bərpa işləri aparılır.
Həmin gün hadisə yerində olan əməmkdaşlarımıza Şəhər İcra Hakimiyyətinin nümayəndələrinin verdiyi məlumata görə hadisəyə səbəb qrunt və kanalizasiya sularının torpağın altına yığılması olub.
Sumqayıt “Su-kanal” idarəsindən “168 saat”a dünən verilən məlumata görə artıq ərazidə işlər yekunlaşmaq üzrədir:
“Orada kanalizasiya xəttində sızıntı var imiş. Həm bu xətdən axan su, həm də qrunt suları torpağı yuyub aparıb. Alt qat boşaldığından çökmə baş verib. Kanalizasiya xəttini dəyişdik. İşlər yekunlaşmaq üzrədir.”
Hadisə nəticəsində ilkin olaraq 3 qadının xəsarət aldığı bildirilsə də, Şəhər Təcili Tibbi Yardım Stansiyasından bu hadisə nəticəsində xəsarət almış heç bir vətəndaşın onlara müraciət etmədiyini bildirdilər.
Təcili Tibbi Yardım Xəstəxanasından isə məlumat verildi ki, bu hadisədə xəsarət almış bir qadın xəstəxanaya müraciət edib: “Onda ciddi heç bir şey, sınığı-çıxığı yox idi. Zədə məntəqəsində yardım edildikdən sonra evə buraxıldı.”
Hadisə İnşaatçılar qəsəbəsində telefon və internet xəttini də iflic etdi. Bir həftə ərzində qəsəbədə yaşayan sakinlər telefon və internetsiz qaldılar.
Məlumata görə, burada 1000-dən çox telefon xətti hadisə nəticəsində kəsilib. Yaxın bir gün ərzində problemin aradan qaldırılacağı söylənilir.
Xəbərdən istifadə edərkən istinad etmək vacibdir.
