Bu gün səhər saatlarında metronun “20 Yanvar” stansiyasının qarşısında nəqliyyat müfəttişləri ilə taksi sürücüsü arasında qarşıdurma yaşanıb. 

Axar.az-ın hadisə yerində olan əməkdaşının verdiyi məlumata görə, nəqliyyat “qoçuları” sürücü ilə mübahisə ediblər. Ondan tələb olunub ki, taksini ərazidə saxlamasın. Müfəttişlər sürücüdən qeyri-rəsmi rüsum istəyiblər. 

Sonra mübahisə qızışıb, qəzəblənmiş sürücü maşının baqajından taxta parçası götürərək müfəttişlərin üzərinə hücum çəkib. Sürücünün canını boğaza yığan müfəttişlər geri çəkilərək xidməti maşına oturublar. Ətrafdakılar isə sürücünü sakitləşdirməyə çalışıb.  

Ancaq az sonra yenidən dava başlanıb, müfəttişlər bu dəfə sürücünün köynəyindən yapışaraq zorla yolun əks tərəfinə - “Azərsu” ASC-nin binasına doğru aparıblar. Burada da mübahisə davam edib.