Bu gün Bakı Ağır Cinayətlər Məhkəməsində qətl törətməkdə təqsirləndirilən 1973-cü il təvəllüdlü Ehtiram Hidayətovun cinayət işi üzrə məhkəmə iclası başa çatıb.
Hakim Cavid Hüseynovun sədrliyi ilə keçirilən prosesdə hökm oxunub.
Məhkəmənin hökmü ilə E.Hidayətov 11 il müddətinə azadlıqdan məhrum edilib.
İttiham akrına əsasən, qətl hadisəsi bu il fevralın 4-dən 5-nə keçən gecə Xaçmaz rayonunun Çarxı kəndində törədilib.
Məlum olub ki, kənd sakini, 1973-cü il təvəllüdlü Ehtiram Hidayətov ov tüfəngindən 1973-cü il təvəllüdlü dostu Əfqan Cəfərova atəş açıb. Yaralı hadisə yerindəcə keçinib. Cinayətdən dərhal sonra E.Hidayətov polisə gələrək günahını etiraf edib.
E.Hidayətov və Ə.Cəfərov məktəb partasından bu yana dost olublar və qonşuluqda yaşayıblar. Uşaqlıq dostları arasında münaqişə pul üstündə baş verib.
"Azərbaycan Dəmir Yolları” QSC-də işləyən E.Hidayətov dostuna 700 manat borc verib. Vədə tamam olsa da, Ə.Cəfərov pulu qaytarmayıb. E.Hidayətov dostugilə gedərək pulu istəyib. O, uşağının xəstə olduğunu deyib.
Ə.Cəfərov isə nəinki borcunu qaytarmaq istəməyib, əksinə, uşaqlıq dostunu təhqir edib. Bundan qəzəblənən E.Hidayətov tüfəng dalınca evə gedib. Bir az sonra tüfənglə geri qayıdaraq dostunu güllələyib.
İstintaq orqanı tərəfindən E.Hidayətovun barəsində Cinayət Məcəlləsinin 120.1-ci (qəsdən adam öldürmə) maddəsi ilə ittiham irəli sürülüb.
Məhkəmədə elan olunmuş ittiham üzrə E.Hidayətov özünü tam təqsirli bildiyini söyləyib.
(report.az)
Xəbərdən istifadə edərkən istinad etmək vacibdir.
