Təxminən 45-50 yaşlarında olan bir şəxs körpü üzərində özünü asmaq istəyib
Bu gün saat 12:00 radələrində Bakı şəhəri 3-cü mikrorayon dairəsində yerləşən körpünün üzərində intihara cəhd hadisəsi baş verib. Bir nəfər şəxs körpünün üzərində özünü asmaq istəyib. İntihar etmək istəyən həmin şəxsin 1969-cu il təvəllüdlü Rövşən Seyidi oğlu Abdulov olduğu məlum olub.
Musavat.com-a verilən məlumata görə, hadisə yerinə yüzə yaxın insan toplaşıb. Onların xahişinə məhəl qoymayan kişi hər şeydən bezdiyini və özünü öldürmək istədiyini bildirib.
İntihara cəhd edən şəxs əl-qol hərəkətləri ilə heç kəsi yaxına buraxmaq istəməyib. Ona yaxınlaşacaqları halda kəndiri boğazına keçirib, körpünün üzərindən özünü aşağı atacağını bildirib.
Hadisə yerində olan şahidlərin məlumatına görə, intihara cəhd edən şəxs yaşayışının aşağı səviyyədə olmasından şikayətlənərək, artıq ailəsini dolandıra bilmədiyinə görə ölmək istədiyini körpü ətrafına toplaşan insanlara söyləyib.
Hadisə yerinə gələn polis əməkdaşlarının və insanların xahişlərindən sonra kişi intihar etmək fikrindən vaz keçib. Polislər əməkdaşları onu bölməyə aparıblar.
Son məlumatlara görə, onun Nəsimi Rayon Polis İdarəsinə aparıldığı bildirilir.
Xəbərdən istifadə edərkən istinad etmək vacibdir.
