İki gündür Bakının altını üstünə çevirməyə çalışan külək gücləndi. 

ANS TV-nin məlumatına görə, paytaxtda müşahidə olunan güclü şimal-qərb küləyi bir neçə ağacı kökündən qoparıb. 

Yasamal rayonu, Süleyman Tağızadə küçəsi 115-də tikilməkdə olan hündürmərtəbəli binadan tikinti materiallarının həyət evlərinə düşməsi nəticəsində mənzillərə ciddi ziyan dəyib. Hadisə nəticəsində 5 nəfər xəsarət alıb. Xəsarət alan sakinlərə dərhal Bakı şəhər təcilli tibbi yardım stansiyanın həkimləri tərəfindən ilkin yardım edilib. Sakinlər baş verənlərdən sonra hələ də qorxu içərisindədirlər. Hazırda hava şəraitinin belə keçməsi fəsadların artacağınadan xəbər verir. Güclü küləklə bağlı dövlət qurumlarına əvvəlcədən xəbərdarlıq edilib. 

Hidrometeoroloji Proqnozlar Bürosunun müdir müavini Gülşad Məmmədovanın sözlərinə görə, paytaxtda davam edən güclü şimal küləyi hələ bir neçə gün davam edəcək. 

Güclü küləyin əsməsi nəticəsində Dövlət Bayrağı Meydanında dalğalanan 162 metr hündürlüyü olan Azərbaycan bayrağı da cırılıb.