Ekologiya və Təbii Sərvətlər Nazirliyinin "Qaynar xətt”inə Sumqayıtçay çayı üzərindəki körpünün altına kimyəvi maddələr olan kisələrin atılması ilə bağlı daxil olan məlumatı nazirliyin 4 saylı Regional Ekologiya və Təbii Sərvətlər İdarəsinin əməkdaşları yerində araşdırıblar. Fakt təsdiqini tapıb.
Nazirliyin mətbuat xidmətindən Xeberle.com-a verilən məlumata görə, araşdırma zamanı həmin ərazidə hər birinin çəkisi 25,2 kiloqram olan 300-ə yaxın ammonium-bi-flüorid duzu ilə dolu kisələr aşkarlanıb.
Nazirliyin Təhlükəli Tullantıların İdarə Olunması üzrə Milli Mərkəzinin əməkdaşları kisələri ərazidən təhlükəli tullantılar poliqonuna daşıyıblar.
Kisələri əraziyə atan şəxslərin kimliyinin müəyyənləşdirilməsi məqsədilə Sumqayıt Şəhər Polis İdarəsinə məktubla müraciət edilib.
Xəbərdən istifadə edərkən istinad etmək vacibdir.
