“Atlant” istirahət kompleksində hər hansı silahlı insident olmayıb və Quba rayon icra başçısının oğluyla bağlı deyilənlər əsassızdır”. Bu barədə Modern.az-a Daxili İşlər Nazirliyinin mətbuat xidmətinin rəis müavini Ehsan Zahidov məlumat verib.

Mətbuatda gedən məlumatlara görə, Quba Rayon İcra Hakimiyyətinin başçısı Mübariz Ağayevin oğlu “Atlant” istirahət kompleksində atəş açıb. Məlumata görə, məmur oğlu istirahət mərkəzinə qızlarla gedib. Orada hələlik bəlli olmayan səbəblərdən münaqişə yaranıb. Mübariz Ağayevin oğlu havaya atəş açmağa başlayıb.

Ehsan Zahidov bildirib ki, avqustun 1-nə keçən gün gecə saatlarında “Atlant” istirahət kompleksində silahlı insident deyil, sadəcə iki şəxs arasında mübahisə baş verib. 

“Baş verən olay bəzi saytlarda silahlı insident kimi təqdim edilib ki, bu da həqiqətə uyğun deyil. İcra başçısının övladı ümumiyyətlə, hadisə yerində olmayıb. Onun guya kimisə güllələməsilə bağlı verilən məlumatların heç bir əsası yoxdur”.