İşğalçı Ermənistan ordusunun son günlər Azərbaycanla təmas xəttində törətdikləri təxribat-diversiya aktları nəticəsində kapitan rütbəli iki hərbçisi – Srapion Melkonyan və Sarkis Stepanyan ağır yaralanıb.   

 Teleqraf.com Ermənistan mətbuatına istinadən xəbər verir ki, hər iki şəxs hazırda İrəvandakı mərkəzi kliniki hərbi hospitalda müalicə olunur.

 “İnsident iyulun 30-da Horadizdə baş verdi. Açılan atəş nəticəsində hərbçi yoldaşım yıxıldı, mən onu ərazidən çıxarmaq üçün ardınca getdim, bu zaman özüm də yaralanaraq yıxıldım”, deyə 26 yaşlı kapitan Melkonyan bildirib.   

Hospitaldan reportaj hazırlayan jurnalist qeyd edib ki, S.Melkonyan ayağının bir hissəsini və üç barmağını itirib. Digər yaralı, kapitan S.Stepanyanın da vəziyyəti ağırdır.

Tibb xidməti mayoru Qayane Ovannisyan yaralılardan birinin hospitala iyulun 30-da, digərinin digərinin isə iyulun 31-də daxil olduğunu bildirib: “Aldıqları yaralar nəticəsində hər iki şəxsin vəziyyəti ağır idi. Çünki hər iki şəxs ağır zədələr almışdı. Əl və ayaqların amputasiyası və çoxlu qanitirməyə məruz qalmışdılar. Hazırda hər iki şəxsin vəziyyəti sabit ağır olaraq qiymətləndirilir”.