“Luqanskda itkin düşmüş Vüsal Bağırov və Səbail Axundov barədə 2 aydan çoxdur heç bir məlumat yoxdur. Bundan başqa, daha iki nəfər azərbaycanlı - Lənkəran şəhərindən olan Cahangir və Tərtər rayonundan olan İkram da itkin düşüb”. 
Bu barədə Modern.az saytına Luqansk Vilayəti Azərbaycanlıları Konqresinin sədri Rasim Uğurluyev məlumat verib.

R. Uğurluyevin sözlərinə görə, Cahangir və İkram sonuncu dəfə Krasnadonun Rusiya ilə sərhəd olan İzvalinin rayonunda qohumları ilə telefon vasitəsilə danışıblar. 
“Bir daha da onlarla əlaqə saxlamaq mümkün olmayıb. Separatçılar tərəfindən aparıldıqlarına dair məlumat olsa da, bu günə qədər öldükləri ya da yaşadıqlarına dair xəbər alınmayıb”.

Qeyd edək ki, son günlər ərzində Luqamskda itkin düşənlərlə yanaşı, 3 nəfər azərbaycanlı - Rövşən Qasımov, Telman Cəfərov və Elman Əlili separatçılar tərəfindən öldürülüb.

Rasim Uğurluyev məlumat verib ki, avqustun 6-da gecə saatlarında Ukraynanın Donetsk vilayətinin Strabeşovskiy şəhərində azərbaycanlılara məxsus “Ağdam” restoranı partladılıb.

Hadisənin törədilməsində iki versiya olduğunu söyləyən Uğurluyev “Ağdam” restoranının partlayışı nəticəsində orada aşpaz kimi çalışan Rusiya vətəndaşının həlak olduğunu bildirib. 
“Bir nəfər həlak olub, restorannın sahibi əslən ağdamlı olan Qubad Sarıyevə 1 milyon dollardan artıq ziyan dəyib. Məlum olan iki versiya var ki, obyekt ya “qrad”la, ya da havadan vurulub. Bu barədə dəqiq informasiya yoxdur. Məsələylə bağlı ölkəmizin Ukrayna səfirliyinin əməkdaşı Şahin Ocaqov da məlumatlıdır”.