Xəbər verdiyimiz kimi, Sumqayıtda qaz sızması nəticəsində partlayış baş verib.
Xeberle.com-un məlumatına görə, şəhərin 1-ci mikrorayon, bina 128/34 ünvanında baş verən hadisə nəticəsində xəsarət alanların sayı 6 nəfər olub. Xəsarət alanlar ilk olaraq Sumqayıt Təcili Tibbi Yardım Xəstəxanasına aparılıb. Onlara ilkin tibbi yardım göstərilib və 1 nəfərin xəsarəti yüngül olduğundan ambulator müalicəyə buraxılıb. Digər 5 nəfər isə Bakı şəhərinə Yanıq Mərkəzinə göndərilib. Xəsarət alanların vəziyyəti orta ağır qiymətləndirilir. Yaralılardan 2 nəfəri "Azəriqaz” İstehsalat Birliyində qaynaqçı və mühəndis işləyən şəxslərdir.
Faktla bağlı araşdırma aparılır.
xxx
21:01
"Azəriqaz” İstehsalat Birliyi Sumqayıtda qaz sızması nəticəsində baş vermiş partlayışla bağlı məlumat yayıb.
Birlikdən Xeberle.com-a verilən məlumata görə, bu gün saat 17:00 radələrində Sumqayıt Qaz İstismarı İdarəsinin xidmət sahəsinə aid olan 1-ci mikrorayon, bina 128/34 ünvanında qaz sızması barədə məlumat daxil olub.
Qəza Dispetçer Xidmətinin əməkdaşları – bir nəfər qaynaqçı və bir nəfər mühəndis həmin ünvana baş çəkiblər. Təhlükəsizlik qaydalarına əməl olunmaqla bina xaricindən qaz təchizatı dayandırılıb. Lakin 5-ci mərtəbədə yığılıb qalan qaz kütləsinin çıxış imkanları məhdud olduğundan kiçik partlayış qeydə alınıb. Partlayışa səbəb isə sakinlər tərəfindən pəncərələrin və dama çıxışda yerləşən pilləkən qəfəsinin olduqca kip şəkildə bağlanılmasıdır. Bu isə havalanmaya ciddi mane yaradıb, yuxarı – sonuncu mərtəbəyə yığılan qaz kütləsi binadan xaricə çıxmayıb. Hadisə zamanı "Azəriqaz” İstehsalat Birliyinin 2 əməkdaşı – qaynaqçı və mühəndis yüngül yanıq xəsarətləri alıb, onlar xəstəxanaya yerləşdirilib, vəziyyətləri normaldır.
Xəbərdən istifadə edərkən istinad etmək vacibdir.
