2013-cü ilin dekabrında Sumqayıtda baş vermiş silahlı münaqişəyə görə tutulan şəxslərin məhkəməsi davam edir. Bakı Ağır Cinayətlər Məhkəməsində noyabrın 4-də keçirilən prosesində 2 zərərçəkən və 15-ə yaxın şahid dindirilib.Hakim Səbuhi Hüseynovun sədrliyi ilə 13 nəfər mühakimə olunur, prosesdə 6 zərərçəkənin, 71 şahidin dindirilməsi nəzərdə tutulur.Rəsmi məlumata görə, silahlı münaqişə ekstremist təmayüllü xəvaricilərlə sələfi təriqətinə mənsub bir qrup şəxs arasında baş verib. İstintaqı Baş Prokurorluğun Ağır Cinayətlərə Dair İşlər üzrə İstintaq İdarəsi aparıb.

Vəkil Fariz Namazlı "Media forum” saytına deyib ki, zərərçəkənlər Elşən və Rövşən Musayev qardaşları ifadələrində təqsirləndirilən şəxsləri günahkar bilməyiblər: "İttiham aktına görə, Elşən Musayev qumbara partladıb, ətrafa atıb. İstintaqda ifadə vermişdi ki, ona qolundan xəsarət yetiriblər. Amma məhkəmədə ifadəsində dedi ki, xəsarətləri özü-özünə yetirib.

Rövşən Musayev də bildirdi ki, təqsirləndirilən şəxslərin heç birindən şikayəti yoxdur, konkret kimlərisə hadisə yerində görməyib.

Şahidlərin əksəriyyəti ifadəsində bildirdi ki, hadisə yerində olmayıblar. Konkret kimlərin orada olması, kimlərin kiməsə xəsarət yetirməsi, əllərində hansı əşyaların olmasını görməyiblər, xatırlamırlar”.

Vəkil deyib ki, təqsirləndirilən şəxslər ötən proseslərdə ifadə veriblər: "Onlardan 3-4 nəfəri ifadə verməkdən imtina edib. Deyirlər ki, istintaqda qanunsuzluqlar görmüşük, məhkəmənin ədalətinə inanmırıq”.

Proses noyabrın 11-də digər zərərçəkənlərin və şahidlərin dindirilməsi ilə davam edəcək.