Sumqayıt şəhər polisi və Baş Mütəşəkkil Cinayətkarlıqla mübarizə idarəsinin keçirdiyi birgə əməliyyat zamanı Sumqayıtdakı evlərin birindəki məscid kimi tikilidə xeyli sayda silah-sursatın aşkar olduğu bildirilir. Hadisə ilə bağlı 1978-ci il təvəllüdlü Zöhrab Şıxəliyevin saxlanıldığını deyən polis bildirib ki, tikilidə "yəqin ki, dini ibadətlər həyata keçirilib”.

Bunu Daxili İşlər Nazirliyinin mətbuat xidmətinin rəis müavini Ehsan Zahidov Sumqayıtda saxlanılan şəxsə məxsus məscid və mədrəsə kimi tikilidə təlimlərin keçirilib-keçirilmədiyi barədə sualı şərh edərkən deyib. Onun sözlərinə görə, hazırda araşdırmalar aparılır və bu məsələ ilə daha kimlərin əlaqəli olduğu haqda araşdırmalardan sonra açıqlama veriləcək. DİN-nin yaydığı məlumata görə, Sumqayıt şəhər sakini Zöhrab Şıxəliyevin üzərindən 3 patronu olan "Valter" markalı tapança aşkarlanıb. "Evə baxış zamanı həyətdə qanunsuz inşa edilmiş məscid və mədrəsə kimi istifadə olunan yeraltı tikili aşkar olunub. Orada və evində aparılan axtarış zamanı isə 3 ədəd qumbara, 48 müxtəlif çaplı patron, 6 ədəd partladıcı detonator, 2 ədəd təhlükəsizlik kamerasının yaddaş qurğusu, habelə yayılması qanunla qadağan edilmiş 500 ədəd dini ədəbiyyat və 210 ədəd disk tapılaraq götürülüb”, - deyə rəsmi məlumatda bildirilir.

Dini Qurumlarla İş üzrə Dövlət Komitəsinin sədri Mübariz Qurbanlı açıqlamasında Sumqayıtda aparılan əməliyyatı "qanunauyğun və vacib” adlandıraraq oxşar əməliyyatların başqa ərazilərdə də keçiriləcəyini deyib. "Burada söhbət yalnız dindən getmir. Bu adamlar faktiki olaraq terror şəbəkəsi kimi bir qurumu yaratmağa cəhd edirdilər. İctimaiyyət də hüquq-mühafizə orqanlarımızın dini radikallara qarşı mübarizəsini müdafiə edir. Bizim komitənin də əsas vəzifələrindən biri bu cür zərərli radikalların ideoloji kökünü kəsmək, təmizləməkdir." Onun sözlərinə görə, "kimlərsə Azərbaycanda qarışıqlıq yaratmağa cəhd edəcəklərsə, qarşısı alınacaq”.

Xatırladaq ki, sentyabrın sonunda Milli Təhlükəsizlik Nazirliyinin keçirdiyi əməliyyat nəticəsində ölkədən kənarda qanunvericiliklə nəzərdə tutulmayan silahlı birləşmələri və ya qrupları yaratma və yetkinlik yaşına çatmayanı cinayətkar fəaliyyətə cəlb etmə maddələri ilə ittiham olunan 26 Azərbaycan vətəndaşı saxlanılıb. (analitik.az)