Ötən ilin dekabrında Sumqayıtda baş vermiş silahlı münaqişəyə görə tutulan şəxslərin məhkəməsi davam edir. Noyabrın 18-i Bakı Ağır Cinayətlər Məhkəməsində keçirilən prosesdə şahidlər dindirilib.Hakim Səbuhi Hüseynovun sədrliyi ilə keçirilən prosesdə 11 şahid ifadə verib.Ümumilikdə silahlı münaqişəyə görə 13 nəfər mühakimə olunur. Prosesdə 6 zərərçəkən, 71 şahid keçir.Vəkil Fariz Namazlı "Media forum” saytına deyib ki, 18 noyabr prosesində dindirilənlər arasında həm hal şahidləri, həm də polis əməkdaşları, əməliyyat işçiləri olub: "Bəziləri evdə, avtomobildə aparılan axtarışlarda iştirak edən, bəziləri də hadisə yerində olan şəxslər idi. Hadisə yerində olan şəxslər konkret kimləri gördüklərini bilmirlər, həmin şəxsləri tanımadıqlarını deyirlər. Evdə axtarışda iştirak edən şəxslər də bir-birinə ziddiyyətli ifadələr veriblər. Bir neçə şahid deyir axtarış zamanı video çəkiliş aparılıb, digərləri bunu təkzib edir.Növbəti prosesdə qalan şahidlər dindiriləcək. Hələ ki, məhkəmədə ittiham tərəfin topladığı sübutlara baxılır. Bu bitəndən sonra müdafiə tərəfin hansısa vəsatəti olarsa, onlara baxılacaq. Şahidlərin ifadəsindən sonra işə xitam verilməsi, bəzi sübutların sübutlar siyahısından çıxarılması haqqında vəsatət verəcəyik”.Rəsmi məlumata görə, silahlı münaqişə ekstremist təmayüllü xəvaricilərlə sələfi təriqətinə mənsub bir qrup şəxs arasında baş verib. Nəticədə bir neçə Sumqayıt sakini xəsarət alıb. İstintaqı Baş Prokurorluğun Ağır Cinayətlərə Dair İşlər üzrə İstintaq İdarəsi aparıb.