Tərlan kişi ağarmış saqqalını sığallaya –sığallaya əsasına tutunub ayağa durdu. Sınmış, dağılmış ümidlərini də toparlayıb icra hakimiyyətinə yazdığı şikayət məktubu ilə bərabər zərfin içərisinə qoydu. 4-cü məktub idi yazırdı. Heç birinə cavab almasa da ümidini üzmürdü. Birtəhər axsaya-axsaya poçta özü gedəcəkdi. Məktubun göndərildiyinə tam arxayın olmaq üçün. Məktubu yola saldı. Qəbzi əvvəlki üç məktubun qəbzləri ilə cütləşdirib sol cibinə qoydu.
"Bir ay da gözləyəcəm. Əgər, yenə cavab gəlməsə, bilirəm nə edəcəm” deyib cadarlanmış əllərini yenə ağarmış saqqalı üzərində gəzdirdi.
Bir ay keçdi. Məktubdan hələ də xəbər-ətər yox idi. Yerli İcra Hakimiyyətinin bu hərəkəti Tərlan kişini qəzəbləndirirdi. O səbrli idi. Gözləyirdi. Qarşıdan gələn 9 may qələbə günü münasibətilə İcra Hakimiyyətinin şəhid ailələri ilə görüşəcəyi günü. O gün gəlib çatdı. 1988-1994-cü illərin qan-qadası onun oğlunu da alıb aparmışdı. 6 oğlunu göndərmişdi bu qansız döyüşlərdə vətəni müdafiə etməyə. Bəziləri kimi gizlətmədi oğullarını. "Hamısı vətənə fədadır” deyib qürurla yola saldı hərbi hissəyə. O gündən saqqal saxlayırdı. Şəhid oğlunu hər xatırlayanda qoca gözlər dolur, cəsarətli ürək sürətlə vururdu. Bu gün də gözləri dolmuş, ürək döyüntüləri sürətlənmişdi. Öncə, icra başçısını görmək istəyirdi. Ürəyi dolu idi.
İcra Hakimiyyətinin böyük akt zalı adamla dolmuşdu. Şəhid ailələri bura toplaşmışdılar. Səs-səsə qarışmışdı. Bu vaxt qapı açıldı. Açılmağı ilə də zala sükut çökdü. İcra başçısının adamları ilə zala daxil olmasını görən kimi hamı ayağa durdu. Salamlaşdılar. İcra başçısı əli ilə işarə edib "Oturun, yoldaşlar” dedi. Bakıdan - prezident aparatından gələn qonaqları təqdim edib çıxışına başladı. Odlu–alovlu çıxışı ilə xalqın qeydinə qalan, şəhid ailələrinə yüksək dəyər verən bir dövlət məmuru surəti yaratmışdı. Tərlan kişi səbrlə dinləyirdi. İcra başçısının qətiyyətlə "Əgər müavinlərim sizi eşitməsə, mənim qapımı təpiklə açın” deməsi Tərlan kişiyə toxundu. Səbrlə dinləməkdə davam edirdi. İcra başçısı boğazını ayırtlayıb masanın üstündəki stəkanı əlinə götürdü. Müavin tez su butulkasını açıb stəkanı su ilə doldurdu. Bir qurtum su içib "Buyurun, kimin mənə ürəyində nə sözü var, desin” deyə zala müraciət etdi.
Tərlan kişi bayaqdan bu məqamı gözləyirdi. Ayağa durdu:
Hörmətli başçı, deyirsiniz ki, qulluğunuzda hazıram. Mənim kiçik ofisim vardı. Ofisimi bağladılar. İşsiz-gücsüz qalmışam. Mən dörd dəfə məktub yazmışam sizə. Vəziyyətimin çətin olduğunu bildirmişəm. Kömək istəmişəm. Heç bir cavab verən olmayıb.
Başçı ayağa durdu:
Ola bilməz! Bu nə biabrçılıqdır?!
Deməli, siz deyirsiniz ki, mən yaşda ağsaqqal adam yalan danışıram?! Elə isə bu qəbzlər nədir bəs?!
Hirsindən əli–ayağı əsən qoca cibindəki qəbzləri icra başçısına uzatdı. Prezident aparatından gələn qonaqların yanında pərt olan başçı burnuna qədər qızarmışdı. O, hirsini cilovlaya bilmədi. Müavininə ağzına gələni dedi:
Necə olur ki, mənim bu məktublardan xəbərim yoxdur.
Qorxusundan tir-tir əsən müavin başını uşaq kimi aşağı dikmişdi. Az qalırdı ki, burnu sinəsinə dəysin. Curət edib: "Özünüz məktubları hər dəfə kənara atıb "Rədd eləyin bu kağızları” deyirdiniz”, - sözünü deyə bilməzdi.
Zalda hamı bir-birinə qarışmışdı. "Bu məsələ barədə ölçü götürəcəyik” sözləri ilə iclas bitdi.
Tərlan kişi evinə döndü. Elə bil üstündən ağır yük götürülmüşdü. Amma əsəbi hələ keçməmişdi. Təzyiqi də qalxmışdı.
Buna bir bax, başqa rayondan gəlsə, deyərəm ki, məni tanımır, xalqın halına acımır. Yerli oğlandır. Utanmır, mən yaşda ağsaqqalı yalançı çıxarmaq istəyir.
Deyinə-deyinə dərman götürdü. Yatıb dincəldi.
Bir neçə gün keçdi. Tərlan kişinin 4 oğlu Rusiya Federasiyasında yaşayırdı. O, kiçik oğlu ilə qalırdı. Oğlu Kamil mühəndis idi. Bu gün o, işdən tez qayıtdı.
Nə olub oğlum, niyə qayıtdın? Xəstələnib eləməmisən?
Oğluna "çıtma vursan, qanı damardı”. O, çarəsiz halda "suyu süzülə-süzülə” gəlmişdi.
Müdir məni otağına çağırdı. Dedi ki, sənin kimi 10 işçim daha olsa, mən məmnun olaram. Təəssüf edirəm, oğlum, əlimdən heç nə gəlmir, sən getməlisən...
Mən də çıxıb gəldim.
Deməli, hörmətli başçımız dediyi kimi ölçü götürüb. Əhsən!

Nəsibə Nəsibqızı
baymedia.az