Masallı rayonunda güclü yanğın hadisəsi baş verib.

Hadisə dekabrın 20-də  səhər saat 05.30 radələrində rayonun Çayqırağı kənd sakini, 1970-ci il təvəllüdlü Zirəddin Balaş oğlu Məmmədova məxsus ikimərtəbəli, 6 otaqlı fərdi yaşayış evində qeydə alınıb.  Hadisə yerinə dərhal Fövqəladə Hallar Nazirliyinin (FHN)  Masallı Rayon Yanğından Mühafizə Hissəsinin 4 yanğınsöndürən maşını və canlı qüvvəsi cəlb olunub. Onların səyləri ilə yanğının əhatə dairəsinin genişlənməsinin və alovun yaxınlıqdakı tikililərə keçməsinin qarşısı alınıb. Hadisə zamanı xəsarət alan olmasa da, ümumi sahəsi 360 kvadratmetr olan ev içindəki məişət avadanlıqları ilə birlikdə yanaraq sıradan çıxıb.

Yanğının dəqiq başvermə səbəbləri ekspertizanın rəyindən sonra məlum olacaq.

Faktla bağlı araşdırma aparılır. (apa.az)