"Hazırda Bakı Şəhəri üzrə Təhsil İdarəsinin Daxili Nəzarət Sektorunun əməkdaşları müəllimin azyaşlı məktəbli qıza qarşı etdiyi vəhşiliyi araşdırmaq üçün 53 saylı orta məktəbdədirlər".

Bu barədə Bakı Şəhəri üzrə Təhsil İdarəsindən məlumat verilib.

BŞTİ-dən bildirilib ki, araşdırma prosesində 53 saylı məktəbin direktoru, azyaşlı uşağa vəhşilik etdiyi deyilən müəllim, şagird və onun valideynləri iştirak edirlər. Bununla yanaşı, məktəbə dermatoloq həkim də dəvət edilib.

Sosial şəbəkədə Bakıda müəllimin azyaşlı məktəbli qıza qarşı etdiyi vəhşiliyin görüntüləri yayılıb.

Məlumata görə, "Facebook"da "Sancaq" səhifəsində yerləşdirilən məlumatda deyilir ki, Yasamal rayonu 53 saylı orta məktəbin ibtidai sinif müəllimi Zülfiyyə Hacıyeva birinci sinifdə oxuyan balaca məktəbli qıza qarşı zorakılıq və vəhşilik edib. 

Belə ki, müəllimin balaca qızın saçını dibindən yolduğu və döydüyü iddia olunub. Səbəb isə birinci sinif şagirdinin yazını yaxşı yazmamağı olub.

Məsələ ilə əlaqədər Təhsil Nazirliyinin mətbuat xidmətinin rəhbəri Cəsarət Valehov anspress-ə açıqlamasında bildirdi ki, hazırda baş verən hadisə ilə bağlı məlumatları yoxdur: "Bununla bağlı araşdırma aparılacaq".  (anspress.com)