Bu gün Azərbaycan Premyer Liqasında XXVI tura start veriləcək.
Xeberle.com-un məlumatına görə, ilk gündə iki oyun baş tutacaq.
Turun açılış matçı Gəncədə olacaq. Autsayderlər zonasında qərarlaşan "Kəpəz” avrokuboklara iddia edən "Zirə”ni qəbul edəcək. Turdan-tura mövqeyini itirmək təhlükəsi artan bakılılar səfərdən qələbə ilə dönmək əzmindədir. Sonuncu dəfə 6 il əvvəl - 2017-ci ildə "Zirə”yə qalib gəlməyi bacaran "Kəpəz” isə 6 matçlıq qələbəsizlik seriyasına son qoymağa çalışacaq. "Zirə” hazırda 36 xalla dördüncü pillədə qərarlaşıbsa, aktivində 20 xal olan "Kəpəz” 8-ci yerdədir.
Günün digər qarşılaşmasında bölgə təmsilçisi paytaxtda qonaq olacaq. 56 xalla turnir cədvəlinin ikinci pilləsində olan "Sabah” yavaş-yavaş təhlükəli zonadan uzaqlaşan "Sumqayıt”ı sınağa çəkəcək. Son 5 görüşün dördündə "Sabah”a böyük hesabla məğlub olan "gənclik şəhəri” təmsilçisi yalnız bir dəfə he-heçə ilə öyünə bilib. Samir Abasovun yetirmələri iki illik tilsimi qırmaq istəsə də, öz meydanında çıxış edəcək "Sabah” aşkar favoritdir. "Sumqayıt” 21 xalla yeddinci sıradadır.
Qeyd edək ki, turun digər oyunlarında martın 11-də "Turan Tovuz” "Qəbələ”ni, "Qarabağ” "Səbail”i qəbul edəcək, ertəsi gün isə "Neftçi” "Şamaxı”nın qonağı olacaq.
15:00. "Kəpəz” – "Zirə”
Hakimlər: Kamranbəy Rəhimov, Eyyub İbrahimov, Teymur Teymurov, Namiq Bəkirov
Hakim-inspektor: Rövşən Əhmədov
AFFA nümayəndəsi: İlham Əliyev
Gəncə şəhər stadionu
19:00. "Sabah” – "Sumqayıt”
Hakimlər: Tural Qurbanov, Kamran Bayramov, Şirmamed Mamedov, Əli Əliyev
Hakim-inspektor: Anar Salmanov
AFFA nümayəndəsi: Ramiz Mustafayev
"Bank Respublika Arena”
Xəbərdən istifadə edərkən istinad etmək vacibdir.
