AFFA İntizam Komitəsinin "Sumqayıt” klubunun tərcüməçisi Şahin Abdullayevi 2 oyunluq cəzalandırmasının səbəbi müəyyənləşib.
Bunu "Report”a klubun mətbuat katibi Zaur Xudiyev açıqlayıb.
Z.Xudiyev tərcüməçinin topu kənara vurduğu üçün cəzalandığını bildirib: "Şahin Abdullayev baş məşqçi Samir Abasovun köməkçisidir, həmçinin tərcüməçi funksiyasını yerinə yetirir. Oyunun sonunda top bizim ehtiyat oyunçular skamyasına tərəf gəldi. Şahin də qeyri-ixtiyari olaraq topu meydanın kənarına vurdu. Bu, nümayişkəranə hərəkət deyildi. Sadəcə, topu kənara doğru göndərdi. Bundan sonra başda Urfan Abbasov olmaqla "Qəbələ”nin futbolçuları sərt etirazlarını bildirdilər. Baş hakim də yaxınlaşıb ona qırmızı vərəqə göstərdi. Hakim bunu protokola oyunun bərpasının ləngidilməsi kimi qeyd edib”.
Qeyd edək ki, AFFA İntizam Komitəsi Azərbaycan Premyer Liqasının sonuncu - XXXVI turu çərçivəsində baş tutan "Sumqayıt” – "Qəbələ” oyununun (1:0) 90+5-ci dəqiqəsində meydan sahiblərinin tərcüməçisi Şahin Abdullayevi oyunun bərpasını ləngitdiyinə görə birbaşa qırmızı vərəqə aldığı üçün 2 oyunluq cəzalandırıb. "Sumqayıt” klubu isə 1000 manat cərimələnib.
Xəbərdən istifadə edərkən istinad etmək vacibdir.
