19-21 sentyabr tarixlərində Formula 1 üzrə Azərbaycan Qran Prisi keçirilib. Yarışı canlı izləmək üçün dünyanın müxtəlif ölkələrindən minlərlə turist Bakıya axışıb.
Bakı Şəhər Halqasının mətbuat xidmətindən Modern.az-a verilən məlumata görə, Formula 1 üçün ölkəmizə gələn turistlərin sayı 13 min nəfərdən çox olub.
Onu da qeyd etmək yerinə düşər ki, Formula 1 üzrə Azərbaycan Qran Prisinin müddəti daha 4 il uzadılıb. Yarışlar 2030-cu ilədək Bakıda keçiriləcək.
Milli Məclisin Gənclər və idman komitəsinin üzvü Göydəniz Qəhrəmanov bildirib ki, Azərbaycanda "Formula 1”in keçirilməsinin turizmə böyük faydası var:
"Formula 1"in keçirilməsinə yalnız bir neçə günlük tədbir kimi baxmaq olmaz. Məsələyə daha geniş yanaşmaq lazımdır. Çünki turistlər öz ölkələrinə qayıtdıqda Azərbaycanın turizm potensialı, mətbəxi və tarixi haqda məlumatları bölüşürlər. Nəticə etibarilə yeni turistlərin gəlməsinə səbəb olurlar. Paralel olaraq tədbir zaman dünya mediası Azərbaycana fokuslanır. Bu turizm potensialımızı xarici auditoriyaya yönəltməyimiz baxımından əlveişli mühit yaradır. "Formula 1" dünyada populyar idman növlərindən biridir. Bu idman yarışının öz ərazisində keçirilməsinin arzusunda olan ölkələr var. Çünki bu yarış heç də bütün ölkələrdə keçirilmir”.
Parlamentari vurğulayıb ki, burada infrastrukturun düzgün qurulması, iqtisadi dayanıqlılıq, təhlükəsizlik məsələləri, sabitlik kimi nüanslar böyük rol oynayır:
"Formula 1"in respublikamızda keçirilməsi ölkəmizin güclü iqtisadiyyata malik olmasının, turizm potensialının, eləcə də sabitlik və təhlükəsizlik məsələlərinin yüksək səviyyədə olduğunun göstəricisidir. Azərbaycanda keçirilən digər beynəlxalq tədbirlər də bunun əyani sübutudur. "Formula 1"ə görə turistlərin sayı artır. Şəhərin turistlərlə dolu olmasını, eləcə də "Formula 1" üçün qurulan yerlərdə oturacaqların hamısının dolu olduğunu müşahidə etdik. "Formula 1"in müddətinin uzadılması çox yaxşı xəbər oldu”.
Turizm eksperti Ceyhun Aşurov vurğulayıb ki, biletlərin 80%-dən çoxunun əcnəbi turistlər tərəfindən alınması sevindirici haldır:
"Builki formula yarışları da əvvəlki illərdə olduğu kimi kifayət qədər aktiv keçdi. Sevindirici haldır ki, biletlərin 80%-dən çoxu əcnəbi turistlər tərəfindən alınır. Biletlər tam olaraq satılır. "Formula 1" yarışlarının uğurlu keçirilməsi səbəbindən artıq əlaqəli qurumlar onun ölkəmizdə keçirilmə müddətini 2030-cu ilə qədər uzadıb. Nəzərə alaq ki, "Formula 1"in 90 milyondan çox auditoriyası var. Azərbaycan, Bakı turizm destinasiyası kimi bu qədər şəxsin diqqət mərkəzində olur. Düşünürəm ki, yarışın turizmə faydası çoxdur”.
Ekspert qeyd edib ki, "Formula 1”in davamlılığı ildən-ilə onun populyarlığını artırır:
"Bu öz təsirini turistlərin sayının artmasında da göstərəcək. Əlavə olaraq qeyd etmək istərdim ki, turistlər yalnız "Formula 1"ə görə gəlmir. Onlar eyni zamanda Bakını və yaxın rayonları gəzmək imkanı əldə edirlər. Turizmin digər məhsullarından istifadə etmiş olurlar. Nəticədə, bu ölkəyə valyuta daxilolmalarına müsbət təsir göstərir”.
Xəbərdən istifadə edərkən istinad etmək vacibdir.
