İyunun  28-dək davam edəcək I Avropa oyunlarında 49 ölkədən 20 idman növü üzrə 6000-dən çox idmançı yarışacaq.

Oyunlar zamanı Azərbaycan 291 idmançı ilə təmsil olunacaq. Bəs görəsən  idmançılarımız Azərbaycana nə qədər medal qazandıracaq? İlk beşlikdə hansı ölkələr ola bilər? Bu haqda modern.az saytı idman yazarlarının proqnozlarını öyrənib.

"Qol.az” saytının baş redaktoru Aydın Bağırov:

- Bu tip yarışlarda bəzən proqnozlar özünü doğrultmur. Məsələn, Yay Olimpiya Oyunları yarışlarında dəfələrlə şahidi olmuşuq ki, əvvəlki olimpiya oyunlarının qalibləri uğursuz çıxış ediblər. Ona görə də sualınıza ətraflı cavab verə bilməyəcəm. Amma Azərbaycanın son Olimpiya Oyunlarında 30-cu yeri tutduğunu nəzərə alsaq, idmançilarimizin Baki-2015 oyunlarında da uğurlu çıxış edəcəyini və ilk beşliyə düşəcəyini gözləyirəm. Xüsusilə güləş və karate yarışlarında medalların sayının çox olacağını düşünürəm.

Azərbaycanla yanaşı, Rusiya idmançılarına da azarkeşlik edəcəyəm. Ukraynanın da ilk beşliyə duşəcəyini təxmin edirəm.

"Apasport.az” saytının əməkdaşı Zaur Xudiyev:

- Bu yarışın Azərbaycanda keçirilməsi ölkə adına xoş mənzərə olmaqla yanaşı, həm də bizim idmançıların üzərinə böyük məsuliyyət qoyur. Düşünürəm ki, Oyunlarda iştirak edəcək bütün idmançılar maksimum güc sərf edərək dövlətimizin adını, bayrağımızı yüksəklərə qaldırmağa çalışacaq. Konkret olaraq isə bəzi idman növləri var ki, bunlarda azərbaycanlı idmançıların şanslarını daha yüksək qiymətləndirirəm. Boks, taekvondo, güləş, karate və cüdodan hər birindən ən az iki medal gözləyirəm. Bundan əlavə, atıcılıq, kamandan oxatma və velosiped idmanında da yaxşı nəticələr göstərəcəyimizə inanıram. Təbii ki, qadınlardan ibarət voleybol yığmamız da potensial medalçılardan biridir.

İlk beşliyə gəldikdə isə, düşünürəm ki, Rusiya, Böyük Britaniya, Türkiyə kimi idmanı çox inkişaf etmiş ölkələrlə bərabər, Azərbaycanı da ümumi sıralamanın yüksək pillələrində görə biləcəyik.

"ATV idman” proqramının redaktoru İlkin Xəlilov:

- Konkret medal sayını demək çətindir. Amma təxmini belə ola bilər ki, Azərbaycanın hər zaman qazandığı ənənəvi idman növləri var. Güləş, boks, cüdo, karate, taekvondodan medallar gözləyirəm. Komanda idman növlərindən çimərlik futbol komandası, çimərlik voleybol komandası, o cümlədən qadınlardan ibarət voleybol komandasından da çempionluq olmasa da, ən azı bürünc medal gözləmək olar. Əsas təxminlərim bir neçə idman növünü çıxmaq şərti ilə əksər idman növlərindən medal gözləmək olar.

Qaldı ki, ilk beşliyə, əminəm ki, burda Azərbaycan komandası da yer tutacaq. İspaniya, Rusiya, Türkiyə, Hollandiya və  Almaniya ilk beşlikdə ola bilər.

Azərbaycan idmançılarının iştirak etdiyi bütün idman növlərinə azarkeşlik edəcəm.

  "Futbol+” qəzetinin baş redaktoru Mahir Rüstəmli:

- Bildiyiniz kimi, idmanda proqnoz vermək çətin məsələdir. Hər halda, cəhd edək. Azərbaycan idmançı sayına görə Avropa Oyunlarının üçüncü ölkəsidir. "Doğma divarlar" amilini də nəzərə alsaq, məncə, nikbinliyə müəyyən əsas var. Şəxsən mən 40-45 arası medala ümid edirəm. Güləş, boks, karate, sambo, kanoe və cüdoda ölkəmizə medal qazandıra biləcək idmançılar çoxdur.

Düzdü, gənclər və idman naziri Azad Rəhimov Azərbaycanın komanda hesabında ilk "10-luq"a düşməsini normal nəticə sayır. Fikrimcə, ilk beşliyə də düşə bilərik. Daha doğrusu, yarışlar sonucunda ilk beşliyi  belə görürəm: Rusiya, Böyük Britaniya, Almaniya, İtaliya, Azərbaycan.

"Report" İnformasiya Agentliyinin əməkdaşı Rövşən Əhlimanoğlu:

- İnanıram ki, Azərbaycan ilk dəfə keçiriləcək Avropa Oyunlarında uğurla çıxışı edərək tarixə düşəcək. Lakin bəzi idman növlərində daha çox medala ümid etmək olar. Misal üçün, güləş, boks, karate yarışlarında daha çox medal qazana bilərik. Komanda yarışlarında isə voleybola daha çox inam var. Dəqiq rəqəm deyə bilməsəm də, hər idman növündə ən azı 2-3 medal qazana bilərik.