"Aikido” Federasiyasının Sumqayıt regional bölməsinin fəaliyyətə başlamasının ildönümü təntənəli şəkildə qeyd edilib. Tədbirdə ilk öncə məşqçi, 1-ci dan qara kəmər ustası Elnur Kərimov "Aikido”nun yaranma tarixindən danışıb. Onun sözlərinə görə, "Aikido” XX əsrin ilk dövrlərində Yaponiyada yaransa da, onun kökləri qədim yapon döyüş sənətlərinə gedib çıxır. E.Kərimov qeyd edib ki, "Aikido” qılınc və nizə ilə döyüş sənətlərinin praktiki özünümüdafiə fəndlərini, Cu-cutsu, Aiki-cutsu və digər daha qədim döyüş sənətlərini fiziki və mənəvi kamilləşməni unikal sistemdə birləşdirən Ustad Morihey Ueşiba tərəfindən yaradılıb. "Aikido” beynəlxalq səviyyədə geniş yayılmış digər yapon döyüş sənətlərindən özünün aydın ifadə olunan müdafiə xarakteri, dərin fəlsəfəsi, yarışların olmaması, yaş, cins və fiziki imkanlar fərqindən asılı olmayan məşq sistemi ilə fərqlənir. Daha sonra məşqlərdə davranışları, fəallıqları ilə seçilən şəxslərə diplomlar və hədiyyələr verilib. Tədbirdə həmçinin, qonaqlar öz ürək sözlərini söyləyib və mahnılar səslənib.