9-cu turun sensassiyası Sumqayıtda qeydə alındı. Yerli "Sumqayıt" hazırkı çempion və kubokun sahibi, eləcə də ölkəmizi Avropa Liqasında layiqincə təmsil edən "Qarabağ"ı məğlub etməklə cari mövsümdəki ilk qələbəsini qazandı. Toxunacağım məsələ bu deyil. Məni başqa məsələ narahat edir. Heç kimə sirr deyil ki, Sumqayıt futbol şəhəridir. Burada həmişə futbol olub, güclü futbolçular çıxıb, bundan sonra da olacaq və çıxacaq. "Sumqayıt" yarandığı gündən bu günə kimi, daimi olaraq autsayder mövqeyində olsa da oyunlarına həmişə azarkeş gəlib. Bu gün də eyni tendensiya davam edir. Geridə qalan 8 turda komandanın aktivində bir qələbə belə yox idi. Rəqib isə aşkar favorit hesab olunan "Qarabağ" idi. Buna baxmayaraq, dünən "Kapital Bank Arena"da iynə atsaydın yerə düşməzdi. Düzü mən bilmirəm, görüşün AFFA nümayəndəsi Arif Fərəcov stadionda olub, ya yox, amma onun protokola yazdığı 1380 tamaşaçı sayı qətiyyən reallığı əks etdirmir. "Kapital Bank Arena"nın tutumu 1350 nəfərdi. Dünənki oyunda bütün yerlər dolmuşdu və insanlar matçı pilləkənlərdə oturaraq, ayaq üstə dayanaraq izləyirdi. Elə bu faktın özü deməyə əsas verir ki, təkcə tribunada 2000-ə yaxın azarkeş var idi. Qapı arxası və üzbəüz hasarın arxasındakı kütləni nəzərə alsaq "Sumqayıt" - "Qarabağ" matçını rahat 3000 insanın izlədiyini deyə bilərik. Bu faktın özü onu deməyə əsas verir ki, "Kapital Bank Arena" bu gün "Sumqayıt" üçün yaramır. Ümumiyyətlə, yarım milyonluq əhalisi olan ölkənin ikinci şəhəri üçün 1300 nəfərlik arena absurddu. Məlum məsələdir ki, bu arena ehtiyat meydança kimi nəzərdə tutulub və şəhərin əsas stadionu Mehdi Hüseynzadə adına stadiondu. Amma bu stadion faktiki fəaliyyət göstərmir. Layihəyə görə, yenidən qurulmalıdır. Daha doğrusu, 2015-ci ildə artıq qurulub qurtarmalı idi. Ancaq layhə toz basıb, stadion da günü-gündən dağılb gedir. "Kapital Bank Arena" isə Premyer Liqa üçün yaramır. Belə çıxır ki, hər oyun camaat pilləkənlərdə oturmalı, ayaq üstə, hasar arxasında oyuna baxmalıdır? Sumqayıt azarkeşinin haqqıdır ki, tribunadan normal şəkildə öz komandasını dəstəkləsin. Onların haqqı nəyə görə tapdanmalıdır? Hər oyun onlar nəyə görə, qapı arxasında, hasar dalında qalmalıdır? "Sumqayıt"ın rəhbərliyi, klubun sponsorları bu problemi təcili həll etməlidir. Ya Mehdi Hüseynzadə adına stadion heç olmasa müəyyən qədər təmir olunub Premyer Liqa üçün yararlı vəziyyətə gətirilməli, ya da "Kapital Bank Arena"da təcili əlavə bir tribuna tikilməlidir. Yəqin ki, əsas stadion yenidən qurulacağından təmir işlərinin aparılması məqsədəuyğun sayılmayacaq. Elə isə "Kapital Bank Arena"da ikinci tribuna tikilməlidir. Düzdür, "Sumqayıt" bir qədər də uğuru nətcə göstərsə heç 3-4 minlik tribuna da kifayət etməycək. Ancaq heç olmasa 1300-lük tribunadan yaxşı olardı. Bir daha deyirəm, "Sumqayıt"ın oyununu normal şəkildə tribunadan izləmək hər bir sumqayıtlının haqqıdır. Onları ayaq üstə, hasar dalında saxlayıb haqqlarını əlindən almaq olmaz. Bu problemi təcili həll etmək lazımdır.  
Anar Xanlarov, rekord.az