"Topla PARİSƏ DOĞRU: AÇ-2016” adlı layihəsində silsilə yazılara A qrupunda yer alan Albaniya millisi ilə davam edirik. Layihə "Xeberle.com” saytı və "Sumqayıt” Futbol Klubu tərəfindən təqdim edilir.

Albaniya yığmasının Avropa çempionatına vəsiqə qazanması turnir öncəsi əsl sürprizlərdən olmuşdu. Düzdü, Albaniyada futbolun son illərdə inkişafda olması tarixi uğurun əsasını qoyan faktorlardan idi. Şübhəsiz ki, bu ölkə klublarının beynəlxalq arenada qapazaltı imicindən qurtulması, futbolçuların isə qitənin aparıcı ölkələrində top qovması bu uğuru şərtləndirən əsas məqamlardan idi. Məsələn, komandanın qapıçısı Ertit Berişanın İtaliyanın "Latsio”, müdafiəçi Elseid Husayın "Napoli”, Berat Djimsitinin "Atalanta”, Ermir Lenyaninin Fransanın "Nant”, Mercim Mavrayın isə Almaniyanın "Köln” klubunda forma geyməsi çox şeydən xəbər verir.

Biazi axtardığını tapa bilmir

Albaniya yığmasının ən güclü yeri müdafiə xətti hesab olunur. Komandanın AVRO-2016-ya vəsiqə əldə etməsində "qırmızı-qaralar”ın qapıçısı Ertit Berişanın rolu danılmazdır. Arxa xəttin sağında Elseid Husay, solunda isə "Qarabağ”da çıxış edən və ölkəmizdən Avropa çempionatına yollanması gözlənilən ilk oyunçu olan Ansi Aqolli çıxış edir. Mərkəzdə isə yığmanın əsas siması Lorik Kana forma geyir. Onunla tandemi isə Mercim Mavray təşkil edir. Yarımmüdafiə xəttində Ledyan Memuşay, Miqyen Başa və Talant Caka kimi oyunçuların yer alması asan proqnoza gəlsə də, digər adların kimliyini müəyyənləşdirmək çətindir. Hücum xəttində də problemlər gözə dəyir. Əvvəlki formasından uzaq olan 32 yaşlı Həmdi Salihi artıq yığmanın düşərgəsinə dəvət olunmur. Sokol Şikalleşi, Armando Sadiku, Milot Raşika, Şkelzen Qaşi və Bekima Balay kimi forvardları yığmaya çağıran Canni de Biazinin sonuncuya güvənməsi gözlənilir.

Albaniyanın heyətində Azərbaycan çempionu

Komandanın heyətindən söz düşmüşkən, artıq Albaniya millisinin italiyalı çalışdırıcısı Canni de Biazi komandasının geniş heyətini açıqlayıb. "Qarabağ”ın heyətində ən çox oyun keçirən legioner olan Ansi Aqolinin də dəvət aldığı millidə ümumilikdə 26 futbolçu yer alsa da, may ayının sonunda siyahı 23 nəfərə endiriləcək.

Qapıçılar: Etrit Berişa (" Latsio"), Alban Xodja (" Partizan"), Orqes Şexi (" Skenderbeu")

Müdafiəçilər: Lorik Çana (" Nant"), Arlind Ayeti (" Frozinone"), Berat Djimsiti (" Atalanta"), Merqim Mavray (" Köln"), Amir Rraxmani (" Split"), Elseid Xusay ("Napoli"), Ansi Aqolli (" Qarabağ"), Frederik Veseli (" Luqano"), Naser Aliyi (" Bazel")

Yarımmüdafiəçilər: Ledjan Memuşay (" Peskara"), Erqyus Kaçe (PAOK), Andi Lila (" Yannina"), Miqden Başa (" Komo"), Odise Roşi (" Rieka"), Burim Kukeli (" Sürix"), Ermir Lenyani (" Nant"), Xerolind Şala (" Slovan"), Taluant Djaka (" Bazel"), Armir Abraşi (" Frayburq")

Hücumçular: Bekim Balay (" Rieka"), Sokol Şikalleşi (" İstanbul Başakşehir"), Armando Sadiku (" Vaduç"), Milot Raşika (" Vitess"), Şkelzen Qaşi (" Kolorado Repids")

AÇ iştirakçısı bizə qarşı: Yalnız qeyri-rəsmi oyunlar

Albaniya yığması indiyə qədər yığmamızla rəsmi oyunlarda qarşılaşmayan kollektivlər sırasındadır. Bütün hallarda hazırlıq matçlarında üz-üzə gəldiyimiz "Dağ qartalları” ilə ilk oyunumuz 2000-ci ilin fevral ayında Ta-Qalli şəhərində baş tutmuş və meydan sahibləri minimal hesabla qalib gəlmişdi. Bundan iki il sonra bu dəfə Tiranada millimizi üstələyən albanlar yenə yeganə qolla qalib gəlmişdi. Birdən artıq qol vurulan ilk qarşılaşma isə 2005-ci ilə təsadüf etmiş və bu dəfə də sevinən tərəf Albaniya olmuşdu – 2:1. Milli komandamız Albaniya ilə yalnız son iki matçda məğlub olmayıb. Belə ki, 2008-ci ilin noyabrında Bakıda rəqiblə "sülh” bağlayan (1:1) komandamız 2011-ci ilin noyabrında isə minimal hesablı qələbəyə sevinmişdi.

Albaniya əvvəlki Avropa çempionatlarında:

1960 – iştirak etməyib

1964 – final mərhələsinə yüksələ bilməyib

1968 – final mərhələsinə yüksələ bilməyib

1972 – final mərhələsinə yüksələ bilməyib

1976 – iştirak etməyib

1980 – iştirak etməyib

1984 – final mərhələsinə yüksələ bilməyib

1988 – final mərhələsinə yüksələ bilməyib

1992 – final mərhələsinə yüksələ bilməyib

1996 – final mərhələsinə yüksələ bilməyib

2000 – final mərhələsinə yüksələ bilməyib

2004 – final mərhələsinə yüksələ bilməyib

2008 – final mərhələsinə yüksələ bilməyib

2012 – final mərhələsinə yüksələ bilməyib

Yuxarıda da qeyd etdiyimiz kimi, Albaniya milli komandasının Avropa birinciliyinə vəsiqə qazanması təəccüblə qarşılanmışdı. İndi albanlar növbəti sürpriz üçün əlindən gələni edəcək. Düzdür, onlara inam böyük deyil, ancaq komandanın seçmə mərhələdə Portuqaliya yığmasını səfərdə yenəcəyinə, qrupdakı digər iddialı kollektiv olan Danimarka seçməsinə isə hər iki matçta uduzmayacağına da heç kim inanmırdı.

AVRO-2016-da oyunları:

11 iyun. 17:00. Albaniya – İsveçrə

15 iyun. 23:00. Fransa – Albaniya

19 iyun. 23:00. Rumıniya – Albaniya

Tural Məmmədov
Xeberle.com