"Topla PARİSƏ DOĞRU: AÇ-2016” adlı layihəsində silsilə yazılara A qrupunda yer alan İsveçrə millisi ilə davam edirik. Layihə "Xeberle.com” saytı və "Sumqayıt” Futbol Klubu tərəfindən təqdim edilir.

Tarixi ərzində dördüncü dəfə Avropa birinciliyinə vəsiqə əldə edən İsveçrə yığmasının buna qədər qatıldığı bütün Avropa çempionatlarda qrupda qalması diqqət çəkir. A qrupunda meydan sahibi Fransa, Rumıniya və Albaniya ilə mübarizə aparmalı olan mərkəzi avropalılar o qədər də çətin olmayan qrupda yer alır. Məhz bu səbəbdən "qırmızılar”ın qrupdan çıxması sürpriz sayılmayacaq. İsveçrə klubunun son illərdə çiçəklənmə dövrünü yaşaması, Rikardo Rodriges, Stafan Lixtştayner, Cerdan Şaqiri, Yohan Curu və Fabian Şer kimi yığma üzvlərinin isə avropada adından söz etdirməsi komandaya olan inamı artıran məqamlardandır. "Saatsazlar”ın çatışmayan cəhəti kimi isə Kubilay Türkyılmaz və Aleksandr Fraydan sonra hələ də hücumları lazımınca tamamlayan forvardın olmamasını qeyd etmək olar. Düzdür, son bir neçə ildə Bleyz Nkufo bu işin öhdəsindən heç də pis gəlmirdi, amma Konqo əsilli hücumçunun karyerasını bitirməsi, Haris Seferoviç, Qavranoviç, Eren Derdiyok, Yisip Drmiç və Admir Mehmedi kimi forvardların isə istənilən kimi çıxış edə bilməməsi ön xəttdəki problemləriyenidən qabartdı ki, bu da komandanın oyununa təsirsiz ötüşmür.

Tarixinin ən böyük uğurunu 88 il öncə Olimpiya oyunlarında gümüş medal qazanmaqla əldə edən İsveçrə yığması DÇ-2014-də Fransa, Ekvador və Hondurasla birgə yer aldığı qrupdan çıxmaqla adından söz etdirmişdi. Həmin vaxt turnirin 1/8 finalında Argentina yığmasına əlavə vaxtda uduzan mərkəzi avropalılar qitə birinciliyində də ən azı qrupdan çıxmağa iddialıdır.

Heyəti sabit, taktikası dəyişkən kollektiv

Son illərdə komandanın heyətində olmasa da, taktiki sxemində ciddi dəyişiklər baş verib. İki il öncəsinə qədər Ottmar Hitsfeld rəhbərliyi altında çıxış edən komanda 4-4-2 sxeminə sadiqliyi ilə seçilirdisə, Hitsfelddən sonra millinin baş məşqçi postuna yiyələnən Vladimir Petkoviç komandasını eyni taktiki sxemdən istifadə etməməyə uyğunlaşdırıb. Belə ki, 4-3-3, 4-3-1-2 və 4-2-3-1-i növbəylə sınaqdan keçirən bosniyalı çalışdırıcı Fransada da rəqibə uyğun manevr etmək imkanına malikdir.

AÇ iştirakçısı bizə qarşı: Bakıda üzü qızaran "qırmızılar”

1996-cı ilin avqustunda ilk dəfə dünya çempionatının seçmə mərhələsində milli komandamızla qarşılaşan İsveçrə yığması Fransa-98-in seçmə mərhələsinə Bakıdakı məğlubiyyətlə başlamışdı. Vidadi Rzayevin vurduğu yeganə qolla rəsmi oyunlarda ilk qələbəsini qazanan əsas yığmamız səfərdə rəqibə 0:5 hesabı ilə uduzsa da, bu nəticə "saatsazlar”ın ilk oyundakı məğlubiyyəti unutmağa bəs etmədi.
 

İsveçrə əvvəlki Avropa çempionatlarında:

1960 – final mərhələsinə yüksələ bilməyib

1964 – final mərhələsinə yüksələ bilməyib

1968 – final mərhələsinə yüksələ bilməyib

1972 – final mərhələsinə yüksələ bilməyib

1976 – final mərhələsinə yüksələ bilməyib

1980 – final mərhələsinə yüksələ bilməyib

1984 – final mərhələsinə yüksələ bilməyib

1988 – final mərhələsinə yüksələ bilməyib

1992 – final mərhələsinə yüksələ bilməyib

1996 – Qrup mərhələsi

2000 – final mərhələsinə yüksələ bilməyib

2004 – Qrup mərhələsi

2008 – Qrup mərhələsi

2012 – final mərhələsinə yüksələ bilməyib

AVRO-2016-da oyunları:

11 iyun. 17:00. Albaniya – İsveçrə

15 iyun. 20:00. Rumıniya – İsveçrə

19 iyun. 23:00. İsveçrə - Fransa

Kapitan İsveçrə yığmasına çağırılmadı

İsveçrə yığma komandasının baş məşqçi Vladimir Petkoviç Avropa çempionatı üçün açıqladığı ilkin heyətdə 28 oyunçuya yer verib. Bosniyalı mütəxəssisin "Yanq Boyz”un üzvü Denis Zakarianı ilk dəfə milli komandaya dəvət etməsi, eləcə də millinin kapitanı Gökhan İnləri yığmaya çağırmaması dıqqət çəkir. Mayın 28-də Belçika ilə keçiriləcək yoldaşlıq görüşündən sonra baş məşqçi 23 nəfərlik yekun heyəti açıqlayacaq mütəxəsis geniş heyətdə aşağıdakı oyunçulara yer verib:

Qapıçılar: Roman Bürki ("Borussiya”, Dortmund, Almaniya), Marvin Hits ("Auqsburq”, Almaniya), Yvon Mvoqo ("Yanq Boyz”), Yann Sommer ("Borussiya”, Mönhenqladbax, Almaniya)

Müdafiəçilər: Yohan Curu ("Hamburq”, Almaniya), Niko Elvedi ("Borussiya” Mönhenqladbax, Almaniya), Mixael Lanq ("Bazel”), Stefan Lixtştayner ("Yuventus”, İtaliya), Frankois Mubanje ("Tuluza”, Fransa), Rikardo Rodriges ("Volfsburq”, Almaniya), Fabian Şaar ("Hoffenhaym”, Almaniya), Filipp Senderos ("Qrasshoppers”), Stiv von Bergen ("Yanq Boyz”), Silvan Vidmer ("Udineze”, İtaliya)

Yarımmüdafiəçilər: Valon Behrami ("Uotford”, İngiltərə), Blerim Dzemaili ("Cenoa”, İtaliya), Gelson Fernandes ("Renn”, Fransa), Fabian Fray ("Maynts”, Almaniya), Renato Steffen, Luka Zuffi (hər ikisi "Bazel”), Qranit Xaka ("Borussiya”, Mönhenqladbax, Almaniya), Denis Zakaria ("Yanq Boyz”)

Hücumçular: Ərən Dərdiyok ("Kasımpaşa”, Türkiyə), Brel Embolo ("Bazel”), Admir Mehmedi ("Bayer”, Almaniya), Haris Seferoviç ("Ayntraxt”, Almaniya), Xerdan Şaqiri ("Stok Siti”, İngiltərə), Şani Taraşay ("Qrasshoppers”).

Tural Məmmədov
Xeberle.com