"Topla PARİSƏ DOĞRU: AÇ-2016” adlı layihəsində silsilə yazılara B qrupunda yer alan Ingiltərə millisi ilə davam edirik. Layihə "Xeberle.com” saytı və"Sumqayıt” Futbol Klubu tərəfindən təqdim edilir.

Final mərhələsinə seçmə oyunlarda xal itirmədən vəsiqə əldə edən İngiltərə milli komandası Avropa çempionatına titul arxasınca gedir. Düzdür, "şirlər” heç vaxt nəinki qitənin ən güclüsü, heç finalçısı da olmayıb, ancaq futbolun yaradıcıları artıq bu həsrətə son qoymağa iddialıdır. 1966-cı ildə qazanılan dünya çempionluğundan sonra 50 illik həsrətə son qoyması isə o qədər də inandırıcı görünmür. Hər halda, Roy Hocsonun yetirmələri Almaniya, İspaniya, İtaliya kimi komandalarla mübarizə aparacaq gücdə deyil. Ancaq məhz bu amilin ingilislərin lehinə işləyəcəyini düşünənlər də var. Nə də olsa, əksəriyyət tərəfindən favorit sayılmayan millinin rəqiblərinin İngiltərə yığması ilə oyuna tam köklənməməsi mümkündür və bu amil futbolun yaradıcılarının uğur qazanmasını şərtləndirə bilər. 

"Dərə xəlvət, tülkü bəy"?!

Seçmə mərhələdəki inamlı nəticələrin İngiltərə yığmasının gücündən çox, rəqiblərinin problemlərindən irəli gəlidiyini demək olar. İsveçrədən başqa ciddi rəqibi olmayan "şirlər” seçmə mərhələ boyu eksperimentlər apardı. O qədər də güclü olmayan rəqiblərlə eyni qrupda yer alan ingilislər üçün Estoniya, Litva və San-Marinoya ümumilikdə 21 cavabsız qol vurması heç də onların gücünü nümayiş etdirmir.

Böyük komandanın "kiçik” məşqçisi?!

İngiltərə millisinə Fabio Kapellonun rəhbərlik etdiyi dönəmdə komanda daha əzəmətli görünürdü. Həmin vaxt heyətində Stiven Cerard, Frank Lempard, Con Terri, Eşli Koul və s. kimi ulduz oyunçular cəmləşən kollektiv belə demək mümkünsə, çempionluğa həm layiq, həm də qadir idi. Üstəlik, Kapellonun karyerasını müşayiət edən "gəldim, gördüm, qazandım” devizi belə deməyə əsas verirdi. Ancaq AVRO-2012-nin startı ərəfəsində Con Terinin kapitanlıq məsələsi ətrafında yaranan məlum həngamə italiyan mütəxəssisə vəzifəsini itirmək bahasına başa gəldiyindən dörd il əvvəlki qitə birinciliyində uğur qazanmaq mümkün olmadı. Son Avropa və dünya çempionatında komandaya rəhbərlik edən Roy Hocsona olan ümidlər isə yüksək deyil. Əlbəttə, heç vaxt böyük komandalarda uğur qazanmayan mütəxəssisin praqmatik oyun üslubuna üstünlük verməsi heç də yaxşı qarşılanmır. Axı "kiçiklər”in sükanı arxasında olanda müdafiəyə çəkilib rəqibin oyun üslubuna uyğunlaşmaq qəbul ediləndisə, İngiltərə kimi iddialı yığmada bu seçim dərhal tənqid atəşinə tutulur. Bir sözlə, AVRO-2016-dakı mümkün uğursuzluq Hacsonun milli karyerasına son qoya bilər. 

Məşqçilər korpusunu düşündürən məqamlar

Turnir öncəsi İngiltərə milli komandasınının baş məşqçisi Roy Hocsonu heyətdəki problemlər düşündürməyə bilməz.  Məsələn, yığmanın əsas qapıçısı Co Hart son vaxtlar zəif  təsir bağışlaması, "Stok Siti”dəki ilk çıxışı ilə yığmanın əsas qolkiperi Co Hartı layiqincə əvəzləməyə hazır olduğunu göstərən Cek Batlendin isə zədə səbəbindən Avropa çempionatını buraxacaq olması ingilislər üçün narahatlıq mənbəyidir. Hocson həmçinin müdafiənin sol cinahında kümə güvənəcəyini müəyyənləşdirməkdə çətinlik çəkir. Rayan Bertran daha yaxşı görünsə də, seçmə mərhələdə az şans qazanması suallar yaradır. Bundan başqa, Rahim Sterlinqin durumu, həmçinin zədədən dönən Cek Uilşer və Ueyn Runi İngiltərə yığmasının əsas problemləridir. Siyahıya  zədəli Danni Uelbekin də adını əlavə etsək, vəziyyətin nə yerdə olduğunu anlamaq çətin olmaz.

Ən çox "Liverpul” və "Tottenhem”dən

İngiltərə milli komandasının baş məşqçi Roy Hocsonun AVRO-2016 üçün açıqladığı ilkin heyətdə ən çox "Liverpul” və "Tottenhem”in oyunçularına güvənməsi diqqət çəkir. Belə ki, "qırmızılar”ın və paytaxt klubunun 5 üzvü ilkin siyahıya salınıb. "Mançester Yunayted”in gənc hücumçusu Markus Reşford da dəvətlilər arasındadır.

Qapıçılar: Forster Freyzer ("Sauthempton”), Co Hart ("Mançester Siti"), Tom Hiton ("Bernli")

Müdafiəçilər: Rayan Bertran ("Sauthempton"), Qari Keyhill ("Çelsi"), Natanyel Klayn ("Liverpul"), Denni Rouz, Kayl Uolker (hər ikisi "Tottenhem"), Kris Smollinq ("Mançester Yunayted"), Con Stounz ("Everton")

Yarımmüdafiəçilər: Dele Alli, Erik Dayer (hər ikisi "Tottenhem”), Ross Barkli ("Everton"), Fabian Delf, Rahim Sterlinq (hər ikisi "Mançester Siti"), Daniel Drinkuoter ("Lester"), Cordan Henderson, Adam Lallana, Ceyms Milner (hamısı "Liverpul”), Endryu Tounsend ("Nyukasl"), Cek Uilşer ("Arsenal")

Hücumçular: Harri Keyn ("Tottenhem"), Markus Reşford, Ueyn Runi (hər ikisi "Mançester Yunayted”), Daniel Starric ("Liverpul"), Ceymi Vardi ("Lester").

AÇ iştirakçısı bizə qarşı: Tofiq Bəhrəmova minnətdar olanlar

Uzun illər İngiltərə üçün Azərbaycan futbolu yalnız bir nəfərdən - Tofiq Bəhramovdan ibarət idi. 1966-cı ildə keçirilən mundialın finalında verdiyi mübahisəli qərarlarla britaniyalıları çempion edən yan xətt hakimi indiyədək Britaniyada milli qəhrəman kimi yad edilir. Müstəqillik dönəmində isə 10 il əvvəlki dünya çempionatının seçmə mərhələsində yığmamıza rəqib olan ingilislər Bakıda bir, doğma meydanda isə iki cavabsız qolla qalib gəlmişdi.

İngiltərə əvvəlki Avropa çempionatlarında:

1960 – iştirak etməyib

1964 – final mərhələsinə yüksələ bilməyib

1968 – 3-cü yer

1972 – final mərhələsinə yüksələ bilməyib

1976 – final mərhələsinə yüksələ bilməyib

1980 – qrup mərhələsi

1984 – final mərhələsinə yüksələ bilməyib

1988 – qrup mərhələsi

1992 – qrup mərhələsi

1996 – 3-cü yer

2000 – qrup mərhələsi

2004 – 1/4 final

2008 – final mərhələsinə yüksələ bilməyib

2012 – 1/4 final

İngiltərə milli komandasının Rusiya, Uels və Slovakiya ilə mübarizədə büdrəyəcəyi inandırıcı olmasa da, "şirlər”in  qitə birinciliyində sonuncu dəfə 20 il öncə ən güclü dörd komanda arasında yer alması, ümumilikdə isə son 10 böyük turnirdə yarımfinal mərhələsinə qədər irəlləyə bilməməsi kimi xoşagəlməz statistikanın davam etməsi gözləniləndi.

AVRO-2016-da oyunları:

11 iyun. 23:00. İngiltərə - Rusiya

16 iyun. 17:00. İngiltərə - Uels

20 iyun. 23:00. Slovakiya – İngiltərə

Tural Məmmədov
Xeberle.com