Rusiya yığması Azərbaycan futbol ictimaiyyətinə yad hesab olunmur. Bu təkcə hazırda şimallıların aparıcı üzvü Aleksandr Səmədovun əslən azərbaycanlı olması ilə bağlı deyil. Ən əsas ona görədir ki, xeyli müddət eyni ölkədə - SSRİ-də yaşadığımızdan şimal qonşularımızla vahid milli komandanın uğurlarına sevinmişik. Rusiya yığmasının uğurları da əsasən həmin dövrlə bağlıdır. 1960-cı ildə Avropa, 1956 və 1988-ci ildə Olimpiya çempionu olan SSRİ millisinin uğurlarını Rusiya yığması davam etdirə bilmir. 56 il əvvəl ilk qitə çempionatının qalibi olan, dörd il sonra finalda İspaniyaya uduzan milli sonradan daha iki dəfə ikinci olub. 1972-ci ildə "Neftçi”nin əfsanəsi Anatoli Banişevskinin də oyandığı SSRİ yığması finalda millimizin sabiq baş məşqçisi Berti Foqtsun da yer aldığı AFR-a 0:3 hesabı ilə uduzmuşdu.

Zəiflərlə zəif oynayan "sbornaya”

Hazırkı Rusiya millisinin ən böyük uğuru isə 2008-ci ildə Avropa çempionatında qazanılan üçüncülükdür. Səkkiz il əvvəl qitənin ən güclü dörd yığması sırasına çıxmaqla bürünc medal əldə edən şimal qonşumuz daha sonra bu uğurun davamını gətirə bilmədi. Həmin uğurun ardından DÇ-2010-dan kənarda qalan, AVRO-2012 və DÇ-2014-də isə nəticə qazana bilməyən Rusiyadan bu dəfə də ciddi nəticə gözlənilmir. Düzdür, Rusiya milli komandasının heyəti son illərdə ciddi dəyişikliyə uğramadığından "köhnə qvardiya”nın sistemdaxili fəaliyyətinin yüksək səviyyədə olması gözləniləndir, ancaq orta və aşağı səviyyəli rəqiblərlə yaxşı oynamaqda çətinlik çəkən Rusiyanın Uels və Slovakiya kimi rəqiblərlə eyni qrupda yer alması şimal qonşumuz üçün narahatlıq mənbəyidir. Şimallılar güclü İngiltərədən daha çox bu rəqiblərdən çəkinir. Təsadüfi deyil ki, komanda son Avropa çempionatında Polşa, Çexiya və Yunanıstan, sonuncu mundialda isə Belçika, Cənubi Koreya və Əlcəzair kimi o qədər də güclü olmayan yığmalardan geri qalmaqla mərhələ adlaya bilməmişdi.

Müdafiədə problem gözə dəyir

Rusiyanın zəif nöqtəsi isə müdafiənin mərkəzdir. Berezutski – İqnaşeviç cütlüyü ikinci mərtəbədə elə də yaxşı təsir bağışlamır ki, bu da ruslar üçün başağrısı ola bilər. Moskva CSKA-nın orta xətt oyunçusu Alan Zaqoyevin zədələnərək AVRO-2016- ı üçün açıqlanan heyətdən kənarda qalması da məşqçilər korpusunun planlarını pozur. Yarımmüdafiə xəttindəki digər problem isə İqor Denisovun dayaq yarımmüdafiəçisi mövqeyində istənilən kimi çıxış etməməsidir. Digər tərəfdən, Avropa klublarında çıxış edənlərin yox dərəcəsində olması isə komanda üçün mənfi hal hesab olunur.

Bir azərbaycanlı, iki legioner

Əksər AÇ iştirakçılarının baş məşqçiləri ilkin olaraq geniş heyət açıqlamağa üstünlük versə də, Rusiya yığmasının çalışdırıcısı Leonid Slutski birbaşa 23 futbolçuya dəvət göndərib. Moskva "Lokomotiv”inin braziliyalı qapıçısı Gilyerme və "Şalke”nin alman əsilli Ukraynada doğulmuş müdafiəçisi Roman Noyşdetderin milliyə dəvət edilməsi isə yerli mətbuat tərəfindən təəccüblə qarşılanıb.

Qapıçılar: İqor Akinfeev (CSKA), Gilyerme ("Lokomotiv"), Yuri Lodıqin ("Zenit")

Müdafiəçilər: Aleksey Berezutski, Vasili Berezutski, Sergey İqnaşeviç, Qeorqi Şennikov (hamısı CSKA), Dmitri Kombarov ("Spartak"), Roman Noyştedter ("Şalke"), İqor Smolnikov ("Zenit"), Roman Şişkin ("Lokomotiv")

Yarımmüdafiəçilər: Aleksandr Qolovin, Dmitri Torbinski ("Krasnodar”), Roman Şırokov (hamısı CSKA), Denis Qluşakov ("Spartak"), İqor Denisov ("Dinamo"), Oleq İvanov ("Terek"), Pavel Mamayev ("Krasnodar"), Aleksandr Səmədov ("Lokomotiv"), Oleq Şatov ("Zenit")

Hücumçular: Artyom Dzyuba, Aleksandr Kokorin (hər ikisi "Zenit"), Fyodor Smolov ("Krasnodar")

Rusiya əvvəlki Avropa çempionatlarında:

1960 – SSRİ-nin tərkibində

1964 – SSRİ-nin tərkibində

1968 – SSRİ-nin tərkibində

1972 – SSRİ-nin tərkibində

1976 – SSRİ-nin tərkibində

1980 – SSRİ-nin tərkibində

1984 – SSRİ-nin tərkibində

1988 – SSRİ-nin tərkibində

1992 – MDB-nin tərkibində

1996 – qrup mərhələsi

2000 – final mərhələsinə yüksələ bilməyib

2004 – qrup mərhələsi

2008 – 3-cü yer

2012 – qrup mərhələsi

AÇ iştirakçısı bizə qarşı: Bakıda iki dəfə büdrəyən qonşu

Yığma komandamızla indiyə qədər 5 dəfə qarşılaşan Rusiya yığması seçmə komandamız üzərində yalnız ev qələbələrinə sevinib. DÇ-2010-nun seçmə mərhələsində Moskvada iki cavabsız qolla uduzan Berti Foqtsun komandası sonrakı mundialın seçmə oyununda isə Moskva səfərindən minimal hesablı yenilgi ilə qayıtmışdı. Hər iki matçın cavab qarşılaşmalarında isə ruslar paytaxtımızdan büdrəyərək ayrılmışdı. Həm 2009-cu ilin oktyabrında, həm də 2012-ci ilin sentyabrında 1:1 hesablı nəticəyə razılaşan tərəflərin hələlik ilk və sonuncu hazırlıq matçında isə şimal qonşumuz dörd cavasız qolla qalib gəlmişdi.

AVRO-2016-da oyunları:

11 iyun. 23:00. İngiltərə - Rusiya

15 iyun. 17:00. Rusiya – Slovakiya

20 iyun. 23:00. Rusiya – Uels

Tural Məmmədov