"Topla PARİSƏ DOĞRU: AÇ-2016” adlı layihəsində silsilə yazılara C qrupunda yer alan Polşa millisi ilə davam edirik. Layihə "Xeberle.com” saytı və "Sumqayıt” Futbol Klubu tərəfindən təqdim edilir.

Ötən əsrin 70-80-ci illərində Polşa milli komandası çox güclü idi. Həmin dövrdə Olimiya çempionu olan, eləcə də dünya çempionatında bürünc medal qazanan komandanın uğuru heç də təsadüfi sayılmırdı. Lakin yenə əsrə doğru "kadra”da eniş başladı. Təsadüfi deyil ki, 2008-ci ildə 13-cü cəhtdən seçmə mərhələni adlamaqla, 2012-ci ildə isə meydan sahibi kimi Avropa birinciliyinə vəsiqə əldə edən polyaklar hər iki halda qrupda qalmışdı. Polşa millisi dünya çempionatına isə sonuncu dəfə 2002-ci ildə çıxış edib.

Polşa seçmə komandasını bu dəfə ötən illərə nisbətən daha şansı sayanlar az deyil. Hər halda, seçmə mərhələdə son dünya çempionu Almaniya yığmasını məğlub edən panlardan uğurlu çıxış gözləyənləri qınamaq olmur. Final mərhələsində də Almaniya seçmə komandası ilə eyni qrupda yer alan Adam Navalkanın yetirmələri "bundestim” üzərində qələbənin təsadüf olmadığını sübut etməlidir.

Ümid legionerlərədir

Polşa milli komandasında əsas yük legionerlərin üzərinə düşür. Düzdür, komandanın heyətinin yarıdan çoxu ölkə xaricində top qovanlardır, ancaq kollektiv daha çox yuxarı səviyyəli futbol ölkələrində forma geyən futbolçularına ümid bəsləyir. Vaxtilə yığmaya layiqli futbolçu tapılmaqda çətinlik yaşanırdı. Bu səbəbdən də millidə Fransa və Almaniyadan nəslinin hansısa nümayəndəsi polyak olan oyunçular cəlb olunurdusa, indi vəziyyət daha fərqlidir. Aşkar lideri Robert Levandovski olan polyakların Lukaş Pişçek, Yakub Blaşikovski, Arkadiuş Milik, Kamil Qroşitski, Sebastyan Mila, Qrzeqorz Kruçoviak, Kşiştof Maşçinski və Matsey Rıbus kimi futbolçularının olması sıradan fakt deyil.

Vuranı güclü, tutanı zəif

Polşa milli komandasının heyətinə nəzər saldıqda bütün xətlərində balanslaşmanın olması gözdən yayınmır. Panların çatlşmayan cəhəti etibarlı qapıçılarının olmaması sayılır. Bu baxımdan yığmanın baş məşqçisi Adam Navalkanın üzərində düşünməli olduğu suallar yetərincə çoxdur. Məsələ burasındadır ki, Lukaş Fabianski və Voytsex Şesnı hər hansı bir matçı dünyanın ən səviyyəli qapıçısı kimi də, ən zəif qolkiperi kimi də keçirə bilər. Bu səbəbdən çalışdırıcı tez-tez rotasiyaya əl atır ki, bu da güclü rəqiblərin olacağı turnirdə heç də uğurdan xəbər vermir. Arxa xəttdə adətən sağdan sola Lukaş Pişçek, Kamil Qlik, Lukaş Şukala və Matsey Rıbus "dördlüy”ü forma geyir. Yarımmüdafiədə xəttinin mərkəzində "Sevilya”lı Qrzeqorz Kruçoviakla "Visla”nın üzvü Krzustof Maçinski, onların önündə isə "Ayaks”ın oyunçusu Arkadiuş Milik çıxış edir. Orta xəttin cinahları isə əksər hallarda Kamil Qroşitski və Kuba Blaşikovskiyə həvalə olunur. Hücumçu kimi isə "Bavariya”nın qol silahı Robert Levandovskinin oynayacağına şübhə yoxdur. Cari mövsüm həm klub, həm yığmada yüksək məhsuldarlıq nümayiş etdirən ulduz futbolçunun Fransada sərgiləyəcəyi oyun qazanılacaq nəticəyə birbaşa təsir edəcək.

Fransaya kimlər gedir?

Polşa milli komandasının heyətindən bəhs edərkən qeyd edək ki, artıq baş məşqçisi Adam Navalka hansı oyunçuların Fransaya yollanacağını açıqlayıb. Düzdür, açıqlanan ilkin heyətdə 28 futbolçu yer aldığından beş yığma üzvünün kınarda qalacağı dəqiqdir, ancaq bununla belə, komandanın heyəti böyük ölçüdə məlumdur.

Qapıçılar: Artur Boruç ("Bornmut"), Lukaş Fabianski ("Suonsi Siti"), Voyçex Şesni ("Roma"), Przemislav Titon ("Ştutqart")

Müdafiəçilər: Tiaqo Sionek ("Palermo"), Pavel Davidovits ("Benfika"), Kamil Qlik ("Torino"), Artur Jedrzeyçuk ("Legiya"), Mixal Pazdan ("Legiya"), Lukaş Pitzek ("Borussiya", Dortmund), Masiej Ribus ("Terek"), Bartos Salamon ("Kalyari"), Yakub Vavrziniak ("Leçia")

Yarımmüdafiəçilər: Yakub Blaşikovski ("Fiorentina"), Kamil Qrosiçki ("Renn"), Tomaş Yodloviek ("Legiya"), Bartos Kaputska ("Krakoviya"), Qrzeqorz Kruçoviak ("Sevilya"), Karol Linetti ("Lex"), Krzustof Maçinski ("Visla"), Slavomir Peszko ("Lex"), Filip Stazunski ("Zaqlebie"), Pavel Vszolek ("Verona"), Piotr Zielinski ("Empoli")

Hücumçular: Robert Levandovski ("Bavariya"), Arkaduis Milik ("Ayaks"), Artur Sobieç ("Hannover"), Marius Stepinski ("Rux")

Polşa əvvəlki Avropa çempionatlarında:

1960 – Final mərhələsinə yüksələ bilməyib

1964 – Final mərhələsinə yüksələ bilməyib

1968 – Final mərhələsinə yüksələ bilməyib

1972 – Final mərhələsinə yüksələ bilməyib

1976 – Final mərhələsinə yüksələ bilməyib

1980 – Final mərhələsinə yüksələ bilməyib

1984 – Final mərhələsinə yüksələ bilməyib

1988 – Final mərhələsinə yüksələ bilməyib

1992 – final mərhələsinə yüksələ bilməyib

1996 – final mərhələsinə yüksələ bilməyib

2000 – final mərhələsinə yüksələ bilməyib

2004 – final mərhələsinə yüksələ bilməyib

2008 – qrup mərhələsi

2012 – qrup mərhələsi

AÇ iştirakçısı bizə qarşı: Xal aldığımız ilk komanda

Polşa milli komandası beynəlxalq arenadakı ilk rəqiblərimizdəndir. İlk dəfə 1996-cl ildəki Avropa çempionatının seçmə mərhələsinə qatılan milli komandamız o vaxt polyaklarla eyni qrupda yer almış və rəsmi oyunlardakı ilk xalı da məhz bu komandadan almışdı. Belə ki, polyaklarla ilk oyunda Mieletsdən minimal hesablı yenilgi ilə dönən Ağasəlim Mircavadovun komandası Trabzonda qolsuz heç-heçə ilə xal qazanmışdı. Ancaq bu panlarla oyunda hələlik qazandığımız ilk və son xaldır. Məsələ burasındadır ki, daha sonra dörd dəfə qarşılaşdığımız Polşa bütün hallarda Azərbaycan yığmasına qalib gəlib. Sonuncu dəfə AVRO-2008-in seçmə mərhələsində bizə rəqib olan "ağ-qırmızılar” evdə 0:5, Bakıda isə 1:3 hesablı qələbəyə sevinmişdi. Tərəflərin sonuncudan əvvəlki qarşıdurmasında isə polyaklar daha böyükhesablı qələbə qazanmışdı. On il öncəki dünya çempionatının seçmə mərhələsində Varşavada komandamızın qapısından 8 cavabsız top keçirən sözügedən milli Bakıda isə üç xalı üç qolla qazanmışdı. Bir məqamı da qeyd edək ki, bu matçın nəticəsi həm də milli komandamızın braziliyalı baş məşqçisi Karlos Alberto Torresin istefa verməsinə səbəb olmuşdu.

Son oyunlar nikbinliyə əsas verir

"Ağ-qartallar”ın yüksək səviyyədə keçirdiyi seçmə oyunlardan sonra baş tutan hazırlıq matçlarında da qələbələri sıralaması onlara olan ümidləri artırır. Xatırladaq ki, ötən ilin sonunda Çexiyanı 3:1 hesabı ilə məğlub edən "ağ-qırmızılar” bu ilin martında Serbiya (1:0) və Finlandiyadan (5:0) da güclü olublar.

AVRO-2016-da oyunları:

12 iyun. 20:00. Polşa – Şimali İrlandiya

16 iyun. 23:00. Almaniya – Polşa

21 iyun. 20:00. Ukrayna – Polşa

Tural Məmmədov