Almaniya milli komandası AVRO-2016-nın əsas favoritlərindən biri, bəlkə də birincisi sayılır. Amma bu heç də onların statusu – son dünya çempionu olması ilə bağlı deyil. Məsələ burasındadır ki, dörd qat dünya (1954, 1974, 1990, 2016) və üç qat Avropa çempionu (1972, 1980, 1996) olan "Bundestim” demək olar ki, qatıldığı bütün turnirlərin favoriti sırasında olur. Bu komanda ən zəif təsir bağışladığı dönəmlərdə belə dəfələrlə sübut edib ki, ən azı intizamın hesabına böyük uğurlar qazanmaq olur.

AÇ-2016-ya antirekordla

Almaniya yığma komandası çempionatın favoriti olsa da, komandanın final mərhələsinə antirekordla yüksəlməsi diqqətdən yayınmadı. Seçmə mərhələdə qrup qalibi olsa da, üç qat qitə çempionu tarixinin ən pis nəticəsini – iki məğlubiyyəti təkrarladı. İndiyədək "bundestim” tarixi ərzində yalnız bir dəfə AÇ-1984-ə gedən yolda iki dəfə uduzmuşdu. 10 oyunda 8 xal itirən Lövün yetirmələri Polşa və İrlandiyanın güclü müqaviməti ilə üzləşdiyi qrupda hər iki rəqibinə səfərdə uduzdu. İlk üç oyunda cəmi 4 xalın qazanılması isə Braziliyadakı dünya çempionatına təsadüf edən zəfərdən sonra arxayınlığın üzə çıxması ilə bağlı idi. Maraqlıdır ki, həmin Polşa yığması final mərhələsində də Almaniya ilə eyni qrupda çıxış edəcək.

90 ilə 10 məşqçi

Sabit nəticələr, baş məşqçi Lövün işi, baxımlı futbol – bütün bunlar Almaniya millisinin güclü tərəflərdir. Baş məşqçilərə güvənməsi ilə diqqət çəkən üç qat Avropa çempionları son 90 ildə 10 çalışdırıcıya güvənib. Artıq 10 ildir bu postda olan Yoahim Löv də həmin ənənəni davam etdirir. 2006-cı ildən bəri komandanın "sükanı arxasında” əyləşən Yoahim Lövün dünya çempionatında qazanılan çempionluqdan sonra qitə birinciliyində də uğur qazanmamaq üçün hansısa bəhanəsi qalmayıb. Son illər ərzində Almaniya klublarının beynəlxalq turnirlərdəki uğurları və yetişdirdikləri futbolçular belə deməyə əsas verir. Adətən 4-2-3-1 taktiki sxeminə üstünlük verən 54 yaşlı mütəxəssisin ixtiyarında xeyli sayda, özü də istedadlı futbolçu var. Onların böyük hissəsi yerli çempionatda çıxış edir. Bütün bunlar Lövün xeyrinə olan amillərdəndir.

Sabiq məşqçimizlə gələn çempionluq

Sonuncu dəfə 1996-cı ildə Avropa çempionluğunu bayram edən "tanklar” son 20 ildə qitə birinciliyində titul qazanmasa da, ümumilikdə qitə arenasında üç qızıl, üç gümüş və bir bürünc mükafatla ən azı medalçılar sırasında olur. Maraqlısı isə odur ki, almanların qazandığı üç çempionluqdan ikisi yığmamızın sabiq baş məşqçisi Berti Foqtsun adı ilə bağlıdır. 1972-ci ildə finalda SSRİ yığmasını darmadağın edən AFR millisinin heyətində Berti Foqts da yer almışdı. Onun çıxış etdiyi müdafiə xətti "Neftçi” və Azərbaycan futbolunun əfsanəsi Anatoli Banişevskili SSRİ yığmasını elə zərərsizləşdirmişdi ki, sonda həmyerlimiz və digər bir qrup futbolçu cəzalandırıldı.

Almaniya əvvəlki Avropa çempionatlarında:

1960 – iştirak etməyib

1964 – iştirak etməyib

1968 – final mərhələsinə yüksələ bilməyib

1972 – Çempion

1976 – II yer

1980 – Çempion

1984 – Qrup mərhələsi

1988 – III yer

1992 – II yer

1996 – Çempion

2000 – Qrup mərhələsi

2004 – Qrup mərhələsi

2008 – II yer

2012 – III yer

Millidə 10 legioner

Çox sayda səviyyəli futbolçuları olan "bundestim”də istənilən mövqeyə namizədlər yetərincədir. Bu səbəbdən seçmə mərhələdə eksperimentlər aparan Lövün Avropa çempionatına kimləri aparacağı maraq doğurur. Artıq almanların 27 nəfərlik ilkin heyəti məlumdur. Maraqlıdır ki, ilkin siyahıda qitə birinciliyindən kənar qalacağı deyilən Bastian Şvaynştayger də var. Ümumilikdə 27 oyunçudan 10-u legioner həyatı yaşayır.

Qapıçılar: Manuel Noyer ("Bavariya”), Bernd Leno ("Bayer”), Mark-Andre ter Ştegen ("Barselona”, İspaniya)

Müdafiəçilər: Jerom Boatenq, Joşua Kimmix (hər ikisi "Bavariya”), Əmrə Can ("Liverpul”, İngiltərə), Conas Ektor ("Köln”), Benedikt Hövedes ("Şalke”), Mats Hummels ("Borussiya” Dortmund), Şkodran Mustafi ("Valensiya”, İspaniya), Sebastyan Rudi ("Hoffenhaym”), Antonio Rudiger ("Roma”, İtaliya)

Yarımmüdafiəçilər: Sami Xedira ("Yuventus”, İtaliya), Bastian Şvaynştayger ("Mançester Yunayted”, İngiltərə), Məsut Özil ("Arsenal”, İngiltərə), Yulian Draksler ("Volfsburq”), Toni Kroos ("Real”, İspaniya), Mario Getze ("Bavariya”), Kərim Bellarabi ("Bayer”), Yulian Veyql ("Borussiya” Dortmund)

Hücumçular: Andre Şürrle ("Volfsburq”), Tomas Müller ("Bavariya”), Lukas Podolski ("Qalatasaray”, Türkiyə), Marko Roys ("Borussiya” Dortmund), Mario Qomes ("Beşiktaş”, Türkiyə), Yulian Brandt ("Bayer”), Leroy Sane ("Şalke”).

AÇ iştirakçısı bizə qarşı: Köhnə-yeni rəqib

Almaniya yığma komandası ilə Azərbaycan futbolu arasındakı bağlardan danışmışkən, qeyd edək ki, son dünya çempionu olan Almaniya ilə bu ölkədən olan baş məşqçi Berti Foqtsun dövründə dörd dəfə üz-üzə gəlmişik. Ardıcıl iki seçmə mərhələdə baş tutan qarşılaşmalarda 2 qol vurub, 15-ni buraxan komandamız 4 məğlubiyyətin ikisində böyük hesabla uduzmuşdu. İlk görüş 2009-cu ilin avqustunda DÇ – 2010-nun seçmə mərhələsi çərçivəsində Bakıda Tofiq Bəhramov adına Respubilka stadionunda baş tutmuş və rəqib Bastian Şvaynştanger və Miroslav Klozenin qolları ilə komandamızı xalsız qoymuşdu. Bundan bir ay sonra Hannover şəhərində keçirilən revanş matçında isə rəqib daha amansız olmuşdu – 4:0. Bu komanda ilə növbəti duelimiz isə 2010-ci ilin sentyabrnda AÇ-2012-nin seçmə oyunu çərçivəsində keçirilmişdi. Həmin matç bizim üçün fiasko ilə başa çatmışdı – 6:1. Millimizin yeganə qoluna isə hesab 4:0 olarkən Vaqif Cavadov imza atmışdı. Cavab oyunu isə bir il sonra yenə mərkəzi arenada baş tutmuş və rəqib meydandan 3:1 hesablı üstünlüklə ayrılmışdı. Komandamızın yeganə qoluna isə Murad Hüseynov imza atmışdı.

Xatırladaq ki, qarşıdan gələn DÇ-2018-in seçmə mərhələsində də Almaniya yığma komandası Azərbaycan millisi ilə eyni qrupda mübarizə aparacaq.

AVRO-2016-da oyunları:

12 iyun. 23:00. Almaniya – Ukrayna

16 iyun. 23:00. Almaniya – Polşa

21 iyun. 20:00. Şimali İrlandiya – Almaniya

Tural Məmmədov