Avropa çempionatının debütantı olan Şimali İrlandiya milli komandası qeyri-adi tarixi ilə bütün millilərdən fərqlənir. Amma bu heç də britaniyalıların dünya futbolunda ciddi uğur qazanması ilə bağlı deyil. Məsələ burasındadır ki, 1921-ci ilədək vahid İrlandiya yığması kimi yarışlara qatılan ada təmsilçisi 1921-50-ci illərdə iki komanda kimi iştirak edirdi. Hər iki komandanın eyni ad altında çıxış etməsi azmış kimi, milli üzvləri də gah bu, gah da digər kollektivin heyətində peyda olurdu. Yalnız FİFA-nın etirazından sonra (1950) futbolçular ancaq bir millinin tərkibində çıxış etməyə başladı. Bundan üç il sonra isə Ali futbol qrumu tərəflərdən birinin Şimali İrlandiya, digərinin isə İrlandiya adlandırılmasına nail oldu.

Futbol tarixində ciddi uğuru olmayan "yaşıl-ağlar”ın seçmə mərhələdə təxminən eyni gücdə olduğu yığmalarla mübarizə aparması sonda AVRO-2016-ya vəsiqə qazanması ilə nəticələndi. Rumıniya, Macarıstan, Finlandiya, Yunanıstan və Farer adaları ilə oyunlarda cəmi bir məğlubiyyətlə üzləşən Maykl Onilin "drujinası” 21 xalla vəsiqəni qrup birincisi kimi təmin etdi.

"Veteranlar ordusu”ndan təşkil edilən "yaşıl-ağ ordu”

Şimali İrlandiya seçmə komandasının dünya və Avropa çempionatlarında təcrübəsi olmasa da, komandanın heyətində xeyli təcrübəli simalar var. Məsələn, komandanın qapıçılarını və müdafiəçilərini veteranlar ordusu da saymaq olar. Hər halda, qolkiperlərdən Roy Kerrollun 38, Alan Mannusun 33, Maykl Makqovernin 31 yaşında, arxa xətdə çıxış edən Aaron Hyuz və Qaret Makolinin 36, Kris Beyrdın isə 34 yaşında milliyə dəvət edilməsi belə deməyə əsas verir.

Şimali İrlandiya əvvəlki Avropa çempionatlarında:

1960 – iştirak etməyib

1964 – Final mərhələsinə yüksələ bilməyib

1968 – Final mərhələsinə yüksələ bilməyib

1972 – Final mərhələsinə yüksələ bilməyib

1976 – Final mərhələsinə yüksələ bilməyib

1980 – Final mərhələsinə yüksələ bilməyib

1984 – Final mərhələsinə yüksələ bilməyib

1988 – Final mərhələsinə yüksələ bilməyib

1992 – final mərhələsinə yüksələ bilməyib

1996 – final mərhələsinə yüksələ bilməyib

2000 – final mərhələsinə yüksələ bilməyib

2004 – final mərhələsinə yüksələ bilməyib

2008 – final mərhələsinə yüksələ bilməyib

2012 – final mərhələsinə yüksələ bilməyib

AÇ-yə kimlər gedir?

Bir çox AÇ iştirakçısından fərqli olaraq artıq Şimali İrlandiya milli komandasının AVRO-2016-da hansı "23-lük”lə mübarizə aparacağı məlumdur. Vest Bromviç”in yarımmüdafiəçisi Kris Brantın zədə səbəbindən kənar qaldığı yığmada uzun müddətdir eyni problemdən əziyyət çəkən qapıçı Roy Kerrolun yer alması diqqət çəkir.

Qapıçılar: Roy Kerrol ("Nots Kaunti", İngiltərə), Maykl Makqovern ("Hamilton", Şotlandiya), Alan Mannus ("Sent-Conson", Şotlandiya).

Müdafiəçilər: Kris Beyrd ("Fulhem", İngiltərə), Kreyq Katkart ("Uotford", İngiltərə), Conatan Evans, Qaret Makoli (hər ikisi "Vest Bromviç", İngiltərə), Li Hodson ("Kilmarmok", Şotlandiya), Aaron Hyuz ("Melburn Siti", Avstraliya), Lyuk Makkalok ("Donkaster", İngiltərə), Konnor Maklaflin ("Flitvud", İngiltərə), Paddi Makneyr ("Mançester Yunayted", İngiltərə).

Yarımmüdafiəçilər: Stüart Dallas ("Lids", İngiltərə), Stiven Deyvis ("Sautqempton", İngiltərə), Korri Evans ("Blekbern", İngiltərə), Şeyn Ferqyuson ("Milluol", İngiltərə), Niall Makqinn ("Aberdin", Şotlandiya), Oliver Norvud ("Ridinq", İngiltərə).

Hücumçular: Uill Qriqq ("Uiqan", İngiltərə), Kayl Lafferti ("Birmingem", İngiltrərə), Coş Maqennis ("Kilmarnok", Şotlandiya), Ceymi Uord ("Notingem Forest", İngiltərə), Konor Vaşinqton (KPR, İngiltərə).

AÇ iştirakçısı bizə qarşı: Keçmiş və gələcək rəqibimiz

Yəqin ki, DÇ-2018-in seçmə mərhələsində rəqibimiz olacaq Şimali İrlandiya milli komandasının çıxışını izləmək maraqlı olacaq. Xüsusilə, millimizin baş məşqçisi Robert Prosineçki və futbolçular bu komandanın qarşılaşmalarını izləməlidir. Axı qarşıdan gələn seçmə mərhələdə biz də bu komanda ilə üz-üzə gələcəyik. Xatırladaq ki, DÇ-2006 və DÇ-2014-ün seçmə mərhələlərində də yığmamız bu rəqiblə qarşılaşmışdı. İlk dəfə 2004-cü ilin oktyabrında Bakıda rəqiblə qolsuz heç-heçə edən Azərbaycan millisi 2005-ci ilin sentyabrında isə Belfastdan 2:0 hesablı məğlubiyyətlə qayıtmışdı. Sonuncu dünya çempionatının seçmə mərhələsində isə Şimali İrlandiya yığmasına əsl şok yaşatmışdıq. İlk oyunda - səfərdə matça əlavə olunmuş 5-ci dəqiqədə qapısında qol görməklə üç xalı əldən verən (1:1) əsas yığmamız Bakıdan rəqibini əliboş yola sala bilmişdi – 2:0.

AVRO-2016-da oyunları:

12 iyun. 20:00. Polşa – Şimali İrlandiya

16 iyun. 20:00. Ukrayna – Şimali İrlandiya

21 iyun. 20:00. Şimali İrlandiya – Almaniya

Tural Məmmədov