"Topla PARİSƏ DOĞRU: AÇ-2016” adlı layihəsində silsilə yazılara E qrupunda yer alan İtaliya millisi ilə davam edirik. Layihə "Xeberle.com” saytı və "Sumqayıt” Futbol Klubu tərəfindən təqdim edilir.
 
İtaliya milli komandası sonuncu Avropa çempionatının finalçısı olsa da, bu dəfə komandanın yüksək nəaliyyət qazanacağı inandırıcı görünmür. Hər halda, əksər bukmeyker kontorları apenninlilərdən Fransada uğur gözləmir.
AVRO-2016-nın seçmə mərhələsində Azərbaycan yığması ilə eyni qrupda yer alan Antonio Kontenin yetirmələri ciddi çətinlik çəkmədən Fransaya vəsiqə əldə etdi. Amma bu daha çox Skuadra adzurra”nın zəif qrupda çıxış etməsi ilə bağlı idi. Belə ki, İtaliya yığması birinci yer uğrunda yalnız Xorvatiya ilə mübarizə aparmalı idi ki, sonda Xorvatiyanın gözlənilməz xal itkiləri Kontenin komandasını qrup birincisi etdi.
Dördqat dünya çempionu olan İtaliya milli komandası Avropa çempionatında isə cəmi bir dəfə ən güclü adını qazanıb. Doğma publika qarşısında 1968-ci ildə  çempionluq tituluna yiyələnən  "mavi komanda” artıq 48 ildir ki, qitə çempionatında uğurun həsrətindədir. Düzdür, komanda bir neçə dəfə AÇ-nin qalibi olmağa yaxın olub, amma sonda arzulanan hədəfə çatmaq mümkün olmayıb. Məsələn, 1968-ci ildə qazanılan çempionluqdan 32 il sonra İtaliya yığması növbəti qızıl medallarını əldə etməyə yaxın idi. Lakin Zinəddin Zidanın arxasınca daşıdığı Fransa yarımada təmsilçisini finalda məğlub edə bildi. Düzdür, italiyalılar 6 il sonra DÇ-2006-nın finalında bunun əvəzini çıxdı. Lakin qitə çempionluğu əldən getmişdi. Sonuncu AÇ-də isə italiyanlar həlledici matçda İspaniya seçmə komandasına uduzmaqla ikinci olmuşdu.
 

 

Turnir öncəsi problemlər və məşqçi qayğıları
Hazırda İtaliya milli koamdasında heyətlə bağlı bir sıra problemlər nəzərə çarpır. Mattia Perin, Klaudio Markizio, Rikardo Montolivo və Marko Verrattinin zədə səbəbindən Avropa çempionatından kənarda qalması Antonio Konteni narahat etməyə bilməz. Bundan əlavə, hücum xəttinin idealdan uzaq olması və yaşlı futbolçuların çoxluğu "Skuadra adzurra”nın əsas rəqiblərdən zəif görünməsini şərtləndirir.
 
Qapını bərk çırpmaq arzusu
Şübhəsiz, İtaliya milli komandasının turnirdə motivasiyasının necə olmasından da çox şey asılı olacaq. Düzdür, baş məşqçi başda olmaqla əksər futbolçular hələ ki, ən böyük hədəfə kökləndiklərini əminliklə söyləməyə çətinlik çəkir, ancaq hər halda, "mavi komanda” qitə çempionatından sonra postundan ayrılacaq Antonio Konte major notlarla yola salmaq niyyətindədir. Elə İngiltərənin "Çelsi” klubu ilə razılığa gələn 47 yaşlı mütəxəssis də "qapını bərk çırpmaq” haqqında düşünür.
 
Bu dəfə Pirlosuz
İtaliya milli komandasının azarkeşlərini düşüncəsini məşğul edən məsələlərdən biri də komandanın ən təcrübəli simalarından olan Andrea Pirlonun Avropa çempionatında yer alıb-almaması məsələsi idi. Artıq Pirlonun AVRO-2016-da olmayacağı isə dəqiqdir. Belə ki, baş məşqçi Konte seçmə mərhələdə yığmaya qaytardığı 37 yaşlı yarımmüdafiəçini heyətə daxil etməyib. Pirlo ilə yanaşı, Sebastyan Covinkonun da milliyə dəvət olunmaması təəccüblə qarşılanıb.
Qapıçılar: Canluici Buffon ("Yuventus", İtaliya), Federiko Marketti ("Latsio", İtaliya), Salvator Siriju (PSJ, Fransa).
Müdafiəçilər: Andrea Barzaqli, Leonardo Bonuççi, Corcio Kyellini (hamısı "Yuventus"), Matteo Darmian ("Mançester Yunayted", İngiltərə), Mattia de Siclio ("Milan", İtaliya), Angclo Oqbonna ("Vest Hem", İngiltərə).
Yarımmüdafiəçilər: Federiko Bernardeşi ("Fiorentina", İtaliya), Antonio Kandreva ("Latsio", İtaliya), Daniel de Rossi, Stefan El Şaravi, Alessandro Florenzi (hamısı "Roma", İtaliya), Emanuel Qiaççerini ("Boloniya", İtaliya), Stefano Sturaro ("Yuventus", İtaliya), Tiaqo Motta (PSJ, Fransa), Marko Parolo ("Latsio", İtaliya).
 Hücumçular: Eder Martins ("İnter", İtaliya), Çiro İmmobile ("Torino", İtaliya), Lorenzo İnsiqne ("Napoli", İtaliya), Qraziano Pelle ("Sautqempton", İngiltərə), Simone Zaza ("Yuventus", İtaliya).
 
İtaliya əvvəlki Avropa çempionatlarında:
1960 – İştirak etməyib
1964 – Final mərhələsinə yüksələ bilməyib
1968 – Çempion
1972 – Final mərhələsinə yüksələ bilməyib
1976 – Final mərhələsinə yüksələ bilməyib
1980 – IV yer
1984 – Final mərhələsinə yüksələ bilməyib
1988 – III yer
1992 – Final mərhələsinə yüksələ bilməyib
1996 – Qrup mərhələsi
2000 – II yer
2004 – Qrup mərhələsi
2008 – 1/4 final
2012 – II yer
 
AÇ iştirakçısı bizə qarşı: Arzuolunmaz rəqib
"Skuadra Adzurra” Azərbaycan yığması üçün arzuolunmaz rəqib sayılır. AVRO-2004-ün seçmə mərhələsində İtaliya millisinə quru hesabla uduzan (0:2, 0:4) yığmamız AVRO-2016-nın seçmə mərhələsində də rəqibinə yenilmişdi. Fərq yalnız onda idi ki, bu dəfə milli komandamız hər iki oyunda "mavi komanda”nın qapısına yol tapmışdı. Belə ki, səfərdə 1:2 hesabı ilə məğlub olan komandamız doğma meydanda 1:3 hesabı ilə uduzmuşdu.
AVRO-2016-da oyunları:
13 iyun. 23:00. Belçika – İtaliya
17 iyun. 17:00. İtaliya – İsveç
22 iyun. 23:00. İtaliya – İrlandiya
 
Tural Məmmədov

Xəbərdən istifadə edərkən istinad etmək vacibdir.