Sumqayıtda sambo və cüdo üzrə uğur qazanmış idmançılarla şagirdlərin görüşləri keçirilib

Sumqayıtda sambo və cüdo üzrə uğur qazanmış idmançılarla şagirdlərin görüşləri keçirilib - FOTO

Tarix: 9-06-2016, 10:50 Oxunma sayı: 2 938 Bölmə: İdman

"Azəri İdman Sağlamlıq Mərkəzi” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyə dəstəyi ilə həyata keçirdiyi "Sumqayıt məktəblərində idmanın təşviqi və pulsuz sambo, cüdo məşqlərinin təşkili” layihəsi çərçivəsində növbəti tədbir Sumqayıt şəhər 6 saylı orta məktəbində təşkil olundu.

Tədbirdə məktəbin 5-7-ci sinif şağirdləri iştirak edirdi. Tədbiri açan "Azəri İdman Sağlamlıq Mərkəzi” İctimai Birliyinin sədri, Azərbaycanın Əməkdar məşqçisi, Respublika Fəxri Bədən Tərbiyəsi və İdman İşçisi Mirağa Qiyasov həyata keçirilən layihənin məqsədi və qarşıya qoyulan vəzifələr barədə iştirakçılara məlumat verərək qeyd etdi ki, bu layihənin əsas məqsədi orta məktəb şagirdlərində idmana, əsasən də cüdo və samboya maraq oyatmaq, perspektivi olan yeniyetmələri peşəkar məşqçilərin rəhbərliyi altında pulsuz məşqlərə cəlb etmək, beləliklə də idmanın məktəblilər arasında populyarlaşmasına nail olmaq, onları zərərli vərdişlərə qurşanmaqdan çəkindirməkdir.

Mirağa Qiyasov idmanın gənc nəslin təlim-tərbiyəsində, onlara sağlam həyat tərzinin aşılanması və zərərli vərdişlərdən çəkindirilməsində xüsusi əhəmiyyətindən danışdı. Daha sonra 1970-ci ildən Sumqayıt Kompressorlar zavodunun idman zalında sambo üzrə məşqçilik fəaliyyətinə başlamasını, yetirmələrinin Avropa və dünya çempionatlarında 49 medal qazanmasını, 3 yetirməsinin Azərbaycanın Əməkdar məşqçisi, 4 yetirməsinin Beynəlxalq idman ustası, 30-dan çox çox yetirməsinin idman ustası nəticəsini əldə etdiyini qeyd etdi.
Görüşdə iştirak edən cüdo və sambo üzrə idman ustası, respublikanın əməkdar məşqçisi, veteranlar arasında dünya çempionatının bürünc mükafatçısı İlham Qulamov, Azərbaycan və ümumittifaq yarışların qalibi, SSRİ idman ustası, polis podpolkovniki Sabir Məhərrəmov, respublika və ümumittifaq yarrışların qalibi Namiq Qəniyev, üçqat respublika çempionu, SSRİ birinciliyinin gümüş mükafatçısı, Afrikada keçirilən beynəlxalq yarışın bürünc mükafatçısı, SSRİ idman ustası Vyaçeslav Dudkin, respublika çempionu, dünya çempionatının bürünc mükafatçısı Əmrah Səfərov çıxış edərək böyük idmanda qazandıqları uğurlar barədə tədbirdə iştirak edən şağirdlərə ətraflı məlumat verdilər.
Layihənin eyni məqsədlə növbəti tədbiri isə Sumqayıtda yerləşən Qubadlı rayon Xələc orta məktəbində təşkil olundu. Sambo üzrə Azərbaycan çempionu, Avropa çempionatının gümüş mükafatçısı, Avropa klubları çempionatın gümüş mükafatçıslı, dünya birinciliyinin bürünc mükafatçısı Səbuhi Bədəlov, respublika və ümumittifaq yarrışların qalibi Namiq Qəniyev iştirak edirdi.

Hər iki məktəbdə keçirilən görüşlərdə şagirdlər Sumqayıtda yaşayan, Azəri İdman Sağlamlıq Mərkəzinin idman zalında vaxtıilə Əməkdar məşqçi Mirağa Qiyasovun rəhbərliyi ilə sambo ilə məşğul olaraq keçmiş SSRİ, Avropa və dünya birinciliklərində uğurlar qazanmış tanınmış idmançıları böyük maraqla dinlədilər və suallarla qonaqlara müraciət etdilər.

Qonaqlar da, hər bir şagirdin sualına səmimiyyətlə cavab verir, onları dərslərini yaxşı oxumaqla yanaşı idmanla məşğul olmalarının daha faydalı olmasına inandırmağa çalışırdılar.