"Topla PARİSƏ DOĞRU: AÇ-2016” adlı layihəsində silsilə yazıları F qrupunda yer alan Avstriya millisi ilə yekunlaşdırırıq. Layihə "Xeberle.com” saytı və "Sumqayıt” Futbol Klubu tərəfindən təqdim edilirdi.

Tarixində ikinci dəfə Avropa çempionatında oynamaq hüququ əldə edən Avstriya 8 il öncə meydan sahibi kimi Avropanın əsas futbol formunda yer almışdı. Həmin vaxt mübarizəni qrup mərhələsində dayandıran Avstriya yığmasından bu dəfə də ciddi nəticə gözlənilmir. Düzdür, bu ölkənin futbolu son dövrlər inkişaf mərhələsindədir və bu səbəbdən Avstriya Portuqaliyanın aşkar favorit olduğu qrupda İslandiya və Macarıstanla mübarizədə o qədər də zəif görünmür, amma təxminən bərabər gücdə olan bu üç milli komandadan hansının növbəti mərhələyə adlayacağını proqnozlaşdırmaq çətindir. Avstriya isə ən yaxşı halda qrup səddini aşa bilər.

Ardıcıl 9 qələbə

Avstriya millisi seçmə mərhələni qrup lideri kimi tamamlamaqla və qapısında cəmi beş qol görməklə adından söz etdirsə də, Marsel Kollerin "drujina”sının İsveç, Rusiya, Monteneqro, Moldova və Lixtenşteyn kimi komandaların yer aldığı o qədər də çətin olmayan qrupda çıxış etməsini də qeyd etmək lazımdır. Düzdür, İsveç və Rusiya heç də qitənin zəif yığmalarından sayılmır, ancaq Avstriya ilə oyunlar zamanı İsveç millisinin Zlatan İbrahimoviçin xidmətindən yararlana bilməməsi, Rusiya seçməsinin isə baş məşqçi Fabio Kapello ilə yaranmış problem üzündən istənilən kimi çıxış etməməsi sonda "Das Tim”in işinə yaradı və 9 qələbə, bir heç-heçə əldə edən Avstriya sonda AVRO-2016-ya qrup lideri kimi yollandı. Maraqlıdır ki, qrup mərhələsinin ilk oyununda İsveç yığması ilə heç-heçə oynayan Avstriya bundan sonra ardıcıl 9 qələbə qazanmaqla hamını qabaqladı. Ümumiyyətlə, Avstriya Rumıniya, İtaliya, və İngiltərə ilə birlikdə seçmə mərhələnin 4 məğlubedilməzindən biridir.

Nə taktika dəyişir, nə də heyət

Tsikl boyu 4-2-3-1 taktiki sxemi ilə oynayan Avstriya həm oyun üslubu, həm də forma geyən futbolçular baxımından stabilliyi ilə seçilir. "Qırmızı-ağlar”ın əsasını Almaniya çempionatının ortabab klublarının formasını geyən oyunçular təşkil edir. Yığmanın əsas "çərçivə qoruyucusu” yerli "Austria” klubunun üzvü Robert Almer sayılır. Onun önündə isə adətən Aleksandar Draqoviç və Sebastian Prödl forma geyir. Müdafiənin sağında Florian Klyayn, solda isə Kristian Fuxs çıxış edir. Baş məşqçinin dayaq yarımmüdafiəçisi seçimi isə olduqca maraqlıdır. Belə ki, Almaniyanın "Bavariya” klubunda cinah müdafiəçisi kimi oynayan David Alaba yığmada müdafiəçilərin önündə yer alır. Onunla tandemi isə digər alman klubu "Mayts”ın üzvü Julian Baumqartlinqer təşkil edir. Elə orta xəttin mərkəzində yer alan digər oyunçu da Almaniya Bundesliqasında çıxış edir. Əksər hallarda hücumçuların arxasında yer alan "Verder”li Zlatko Yunusoviç daha çox hücumların təşkilində rol oynayır. Orta xəttin cinhlarında isə Marko Arnautoviç və nominal hücumçu olan Martin Harnik şans qazanır. Yığmanın əsas hücumçusu isə Mark Yanko hesab olunur.

Emil Balayevin komanda yoldaşı AÇ-yə gedən heyətdə

Komandanın heyətindən danışmışkən, Avstriyanın AVRO-2016-ya hansı heyətlə yollanacağından da bəhs edək. İlkin heyətdə 24 oyunçuya yer verən baş məşqçi Koller sonda bir oyunçunu "ixtisar” etməklə yekun heyəti müəyyən etdi. Maraq üçün qeyd edək ki, azərbaycanlı qapıçı Emil Balayevin ötən mövsüm formasını geydiyi "Ayntraxt”dakı komanda yoldaşı Haynts Lindner də Avropa çempionatına yollanacaq heyətdə yer alacaq. Belə ki, Kollerin milliyə çağırdığı 3 qapıçıdan biri məhz odur.

Qapıçılar: Robert Almer ("Austria”), Haynts Lindner ("Frankfurt”, Almaniya), Ramazan Özcan ("İnqolştadt”, Almaniya)

Müdafiəçilər: Aleksandar Draqoviç ("Dinamo”, Ukrayna), Kristian Fuks ("Lester”, İngiltərə), Martin Hinteregger ("Borussiya” Mönhenqladbax, Almaniya), Florian Kleyn ("Ştutqart”, Almaniya), Sebastian Prödl ("Uotford”, İngiltərə), Markus Suttner ("İnqolştadt”, Almaniya), Kevin Vimmer ("Tottenhem”, İngiltərə)

Yarımmüdafiəçilər: David Alaba ("Bavariya”, Almaniya), Yulian Baumqartlinqer ("Maynts”, Almaniya), Qyörqi Qariks ("Darmştadt”, Almaniya), Stefan İlsanker ("Leyptsiq”, Almaniya), Yakob Yantsker ("Lütsern”, İsveçrə), Zlatko Yunusoviç ("Verder”, Almaniya), Alessandro Şöpf ("Şalke”, Almaniya)

Hücumçular: Marko Arnautoviç ("Stok Siti”, İngiltərə), Martin Harnik ("Ştutqart”, Almaniya), Lukas Hinterseer ("İnqolştadt”, Almaniya), Mark Yanko ("Bazel”, İsveçrə), Rubin Okotie ("Münhen-1860”, Almaniya), Marsel Sabitzer ("Leyptsiq”, Almaniya)

Avstriya əvvəlki Avropa çempionatlarında:

1960 – Final mərhələsinə yüksələ bilməyib

1964 – Final mərhələsinə yüksələ bilməyib

1968 – Final mərhələsinə yüksələ bilməyib

1972 – Final mərhələsinə yüksələ bilməyib

1976 – Final mərhələsinə yüksələ bilməyib

1980 – Final mərhələsinə yüksələ bilməyib

1984 – Final mərhələsinə yüksələ bilməyib

1988 – Final mərhələsinə yüksələ bilməyib

1992 – Final mərhələsinə yüksələ bilməyib

1996 – Final mərhələsinə yüksələ bilməyib

2000 – Final mərhələsinə yüksələ bilməyib

2004 – Final mərhələsinə yüksələ bilməyib

2008 – Qrup mərhələsi

2012 – Final mərhələsinə yüksələ bilməyib

AÇ iştirakçısı bizə qarşı: Vaqif Sadıqov üçün əlamətdar rəqib

Avstriya milli komandası yığmamızla indiyə kimi dörd dəfə qarşılaşıb. İlk dəfə DÇ-2006-nın seçmə mərhələsində bizimkilərə rəqib olan "Vundertim” doğma meydanda 2:0 hesabı ilə qalib gəlsə də, Bakıda qolsuz heç-heçə ilə xal itirmişdi. Yeri gəlmişkən, qeyd edək ki, bu matçda əldə olunan bir xal komandamızın ovaxtkı çalışdırıcısı Vaqif Sadıqovun Azərbaycan milli komandasının baş məşqçisi kimi qazandığı ilk və hələlik yeganə xaldır. Avstriya ilə Azərbaycan milli komandasının digər iki qarşılaşması isə AVRO-2012-nin seçmə mərhələsinə təsadüf etmiş və yığmamız hər iki matçda uduzmuşdu. Səfərdə 0:3 hesabı ilə məğlub olan komandamız doğma publika önündə isə 1:4 hesabı ilə yenilmişdi.

AVRO-2016-da oyunları:

14 iyun. 20:00. Avstriya - Macarıstan

18 iyun. 23:00. Portuqaliya – Avstriya

22 iyun. 20:00. İslandiya – Avstriya

Tural Məmmədov