Mehdi Hüseynzadə adına Sumqayıt şəhər stadionu Azərbaycanın, habelə regionun coğrafi yerləşmə baxımından ən gözəl stadionudur. Arenanın bir tərəfi Xəzər dənizi, digər tərəfi isə yaşıllıqla sıx olan Nəsimi adına parkdır. Stadionun inşasına 1954-cü ildə qərar verilsə də, tikinti işləri müəyyən səbəblərə görə təxirə salınmışdı. Lakin 1963-cü ildə meydançanın tikintisinə başlanılmış və 1966-cı il iyulun 1-də istifadəyə verilmişdi. Bu stadionda ilk beynəlxalq oyun 1982-ci ildə Azərbaycanın yeniyetmələrindən ibarət komandası ilə İran millisi arasında olub. Arenadan "Polad", "Vosxod", "Xəzər", "Kimyaçı", "Sumqayıt", "Gənclərbirliyi", "Qarabağ" (Ağdam), "Xəzər Lənkəran" (Lənkəran) və "Standard" komandaları ev oyunları kimi istifadə ediblər. Mehdi Hüseynzadə adına Sumqayıt şəhər stadionunda bir çox istedadlı futbolçu yetişib. 1985-ci ildə 21 yaşlı gənclər arasında dünya çempionatının Çin - Paraqvay qarşılaşması bu stadionda keçirilib. Azərbaycan futbolunun müstəqillik dönəmində "Turan" və "Fənərbağça" arasında keçirilən ilk avrokubok matçı (UEFA Kubokunun cavab oyunu 0:2) da məhz bu stadionda baş tutub. Sumqayıt şəhər stadionu 1979-1980-ci illər və 1993-1994-cü illər ərzində təmirə dayandırlıb. Son olaraq isə 2011-ci ildə meydandançada kosmetik təmir işləri aparılıb. Ancaq təəssüflər olsun ki, artıq xeyli vaxtdır baxımsızlıq ucbatından stadion bərbad vəziyyətə düşüb. Stadionun ot örtüyündən əsər-əlamət qalmayıb. Tribunalardakı taxta oturacaqlar sökülüb-dağılıb. Bundan başqa, paltardəyişmə və digər yardımçı otaqların da təmirə ciddi ehtiyacı var. Dəfələrlə idman ictimaiyyətinin nümayəndələri, futbol adamları, Sumqayıt sakinləri həyəcan siqnalı çalsalar da, bir fayda olmayıb. Və budur, artıq müjdə var. Xeberle.com-un əldə etdiyi məlumata görə, stadionunun yenidən qurulması işlərinə başlanılır. Bu barədə Sumqayıtda 2016-cı ilin sosial-iqtisadi inkişafının yekunlarına və qarşıda duran vəzifələrə həsr olunan hesabat yığıncağında qərar verilib. İcra başçısı Zakir Fərəcov qeyd edib ki, bu arena Sumqayıtın tarixi stadionudur və təmir işlərinin aparılması vacibdir.