Bu gün böyük uğurları ilə Azərbaycan idmanında tarix yazan böyük bir idmançı ailəsi ilə tanış etmək istəyirəm sizi. Söhbət Süleymanovlar ailəsindən gedir. Bu ailə nəinki Azərbaycanda, bəlkə də bütün dünyada ən böyük idmançı ailəsi sayıla bilər. Süleymanovlar ailəsində güləş və ağırlıqqaldırma üzrə müxtəlif miqyaslı yarışların qalibləri var. Bu ailənin 7 üzvündən 2-si indi də idmanla məşğul olur və kifayət qədər tanınmış atletlərdir. Ailənin ən böyük oğlu, ağır atlet Hafiz Süleymanov Dünya və 5 qat Avropa çempionudur. Dünya rekordçusu olan Hafiz indi fəaliyyətini məşqçi kimi davam etdirir. Hafiz təkcə Azərbaycanın deyil, Türkiyənin də bayrağını uca tutmaq üçün ağırlıq qaldırıb. Hafiz Süleymanov 10 il Türkiyə yığmasının şərəfini qoruyub. Bu müddət ərzində o, 2 dəfə Türkiyə komandasına Avropa çempionatının qızıl, 4 dəfə isə dünya çempionatının gümüş medalını qazandırıb. Elxan Süleymanov da böyük qardaşı kimi ağır atletika ilə məşğul olub. O, isə Avropa çempionatının ikiqat qalibi, bir dəfə də Avropa kubokunun sahibi olub. Sidney və Afina olimpiadalarında yığmamızın şərəfini qoruyub. Afina olumpiadasında çiynindən aldığı zədə onun karyerasına son qoyub. Zülfüqar Süleymanov da ağırlıqqaldırma idman növündə öz sözünü deyən idmançılarımızdandır. Onun qazandığı nailiyyətlərə nəzər saldıqda medal kolleksiyasının zəngin olduğunu görmək mümkündür. O, Avropa çempionatının dəfələrlə gümüş və bürünc, eləcə də İslam Həmrəyliyi Oyunlarının bürünc mükafatını qazanıb. Zülfüqarın hər zaman yarışlara böyük əzmlə hazırlaşmasına baxmayaraq, qismətinə əksər hallarda bürünc medal düşüb. O, buna görə heç də məyus olmayıb. Əldə etdiyi bürünc medallara görə çox vaxt Zülfüqarı "qızıla bərabər bürünc oğlan” deyə çağırıblar. O da qardaşları kimi hazırda məşqçi kimi çalışır. Ailənin digər idmançı üzvlərinə gəlincə, Aydın və Qadir Süleymanovlar Yunan-Roma güləşində uğurlarını sadalayıblar. Aydın əməkdar məşqçidir. Avropa çempionatının mükafatçısı Elçin Əliyev, yeniyetmələr arasında dünya birinciliyinin qalibi Emin Bəşərov və bürünc mükafatçısı Vüsal Qurbanov onun yetirmələrindəndir. Ailənin son beşiyi olan Qadir Süleymanov da Yunan-Roma güləşi ilə məşğul olub. O, gənclərin dünya çempionatında gümüş, tələbələrin universiadasında isə bürünc medal qazanıb. O da hazırda fəaliyyətini məşqçi kimi davam etdirir. Süleymanovlar ailəsində hələ də ağır atletika idman növünün davamçıları var. Uşaq yaşlarından Dilavər və Cəsur da bu idmana maraq göstərirlər. Bir sözlə, Süleymanovlar ailəsinin idman ənənələri davam edir. İndi onlar gələcəkdə bayrağımızı beynəlxalq yarışlarda yüksəklərə qaldırmalıdırlar. Hələ Süleymanovlar soyadını Azərbaycanın idman tarixində çox eşidəcəyik.

Xəbərdən istifadə edərkən istinad etmək vacibdir.