Sumqayıtın uşaq futbolundan bəhs edən layihəmiz çərçivəsində bu gün sonuncu yazımızı sizə təqdim edirik.  Heç kimə sirr deyil ki, Azərbaycan futbolunun ən böyük problemlərindən biri futbolçularımızın ölkə xaricinə yollana bilməməsidir. Bunun da bir sıra səbəbləri var. Futbolçuların xarakteri,mentalitet, səviyyəli menecer problemi və s. Əslində istedadlı uşaqları daha erkən ölkədən kənara çıxarmaq lazımdır ki, onlar sonradan hər hansı bir problem yaşamasınlar.  Bu cür uşaqlarımız nə qədər çox olsa Azərbaycan futbolunun gələcəyi üçün bir o qədər faydalı olacaq. Erkən yaşda Avropaya gedən uşaq həm oranın mühitinə daha yaxşı uyğunlaşır, həm də Avropa futbolunu daha erkən qavrayır.  Bu yaxınlarda iki belə futbolçumuz Almaniyaya yollanıb. Hər ikisi sumqayıtlıdır və hər ikisi Sumqayıt futbol məktəbinin yetirməsidir.  Ümumiyyətlə, Sumqayıt futbol məktəbinin Azərbaycan futbolundakı yeri və nüfuzu haqda geniş danışmağa ehtiyac yoxdur.  Bu şəhərdən hər zaman güclü futbolçular çıxıb indi də çıxır və şübhə doğurmur ki, gələcəkdə də çıxacaq. Çünki loru dildə desək futbol, qanlarında var. Hazırda şəhər futbolunun əsas mərkəzi "Sumqayıt” Futbol Akademiyası olsa da adından söz etdirən digər məktəblər də var. Bunlardan biri də təcrübəli mütəxəssis Sabir Əliyevin 2010-cu ildə təsis etdiyi, "Sumqayıtspor” futbol klubudur. Bu futbol klubu sırf uşaq futbol klubu kimi ixtisaslaşıb. Layihəmiz çərçivəsində bu klubun düşərgəsində olub sizə ətraflı məlumat vermişdik. Həmin yazıda da bildirmişdik ki, bu klubdan bir çox istedadlı futbolçular çıxıb, ölkənin dörd bir yanına yayılıblar. 
 Artıq "Sumqayıtspor”un yetirmələrinin səs-sorağı ölkə xaricindən  də gələcək. Haqqınnda söhbət açacağımız bu iki futbolçu da məhz "Sumqayıtspor”un yetirmələridir. Söhbət Vüsal və Xəyal Babayev qardaşlarından gedir. Vüsal 2004-cü ildə, Xəyal isə 2006-cı ildə anadan olub. Hər ikisi futbolun sirrlərini 3 il bundan qabaq Sabir Əliyevin rəhbərliyi altında  öyrənməyə başlayıblar. Hər ikisi kifayət qədər istedadlı uşaq olub və gələcəklərinə böyük ümidlə baxıblar. Bu yaxınlarda ailələrinin Almaniyaya köçməsi səbəbindən onlar da "Suqmayıtspor”dan ayrılmalı olublar. Hazırda ailələri ilə birlikdə Nürnberq şəhəri yaxınlığında yaşayırlar.  Ora gedər-getməz atası oğlanlarını yaşadıqları şəhərcikdə fəaliyyət göstərən "Spvgg Roth” (tam adı "Spielvereinigung Roth”) klubunun düşərgəsinə aparıb. Bu klub Almaniya Regional Liqasında mübarizə aparır. Sözügedən klubun uşaq məşqçiləri Babayev qardaşlarını sınaqdan çıxarmağa etiraz eləmir. Bir neçə günlük məşqdən sonra hər ikisinin hazırlıq səviyyəsi almanları razı salır və "Spvgg Roth” rəhbərliyi onlarla müqavilə bağlayır. Vüsal klubun U-13, Xəyal isə U-11 komandasına qəbul edilib. Ümumiyyətlə, "Spvgg Roth”in ümumilikdə 12 komandası var. Əssa komanda, əvəzedici komanda, U-7, U-9, U-11, U-13, U-15, U-17, U-19 komandaları. U-9 və U-13 komandalarında iki qrup fəaliyyət göstərir. Klubun özünün bazası, yataqxanası, bir neçə təbii örtüklü məşq meydançaları və oyun meydançası var. 
 "Sumqayıtspor”un təsisçisi və baş məşqçisi Sabir Əliyev bizimlə söhbətində hər iki futbolçunun böyük potensialı olduğunu bildirib: "Vüsal və Xəyal çox istedadlı uşaqlardı. Təxminən 3-4 il bundan qabaq bizim kluba gəldilər və mən də hər ikisini yoxlayıb istedadlarını kəşf etdim. Ondan sonra klubumuza qəbul elədim. Almaniyaya getsələr də mən yenə onları "Sumqayıtspor”un təmsilçisi hesab edirəm. İnanıram ki, Almaniyada özlərini ən yaxşı səviyyədə göstərib gələcəkdə Azərbaycan  millisinə böyük fayda verəcəklər”.
 Sonda onu da qeyd edək ki, əgər bu futbolçular Almaniyada uğurlu karyera qurub peşəkar klublarla peşəkar müqaviləyə imza atsalar o zaman həmin müqavilədən gələn gəlirin müəyyən faizi də "Sumqayıtspor”a çatacaq. Çünki UEFA-nın da belə bir tələbi var ki, hansısa futbolçu peşəkar müqaviləyə imza atanda ordan müəyyən faiz də həmin futbolçunu yetişdirən kluba çatmalıdır. Hər halda biz də öz adımızdan hər iki futbolçumuza Almaniya karyerasında uğurlar arzulayırıq.

Xəbərdən istifadə edərkən istinad etmək vacibdir.