Azərbaycan futbolunun pulla tanış olmasından isə 10 il ötür. Məhz 2004-cü ildən bu yana Azərbaycanda bu sahəyə maliyyə qoyulur. Bütün bunlar yerli futbolçuların yaşayışını yaxşılaşdırmaqla yanaşı, həm də əcnəbi oyunçuların ölkəmizə gəlməsinə təkan verib. Bəzi legionerlər Azərbaycana xeyir verib gediblər, bəziləri isə pul görüb “şişiblər”.“Çempion” qəzeti məhz ikinci xüsusiyyətinə görə Azərbaycandan qovulan legionerlərdən bəhs edən yazı hazırlayıb.Teleqraf.com həmin yazını təqdim edir .

Azərbaycana gələn istedadlı oyunçulardan biri idi. Hücumçu kimi qol vurmaq keyfiyyətlərinə malik idi. Amma o, Azərbaycanda oyunundan daha çox tərbiyəsizliyi ilə gündəmə gəldi. Afrikalı futbolçuların onsuz da, nizam-intizamla bağlı problemləri olur. Amma Pate bunu açıq şəkildə göstərdi. Əsgər Abdullayevin sevimli oyunçularından olan Banqura “Gənclərbirliyi”, “Bakı” və “Olimpik”in uğurları üçün çalışıb. Amma ondan klub işçiləri tutmuş, qonşularına qədər hamı narazı qalıb. Odur ki, Banqura Azərbaycan futbolundan birdəfəlik silinib. Məlumat üçün əlavə edək ki, Banqura Azərbaycanda oynadığı ilk ildə bu tip hadisələrlə yadda qalmadı. Əlinə bir qədər pul dəydikdən sonra isə özündən çıxdı və əsl üzünü göstərdi.

Ona “div forvard” da demək olardı. Yəqin ki, diqqətli azarkeşlər Qyoko Haciyevskinin “Bakı”sında cüssəsinə və öz oyununa görə fərqlənən braziliyalı hücumçunu unutmayıblar. Almeyda, xüsusən də, avrokuboklarda “Bakı”ya çox kömək etdi. Vurduğu qollarla diqqət mərkəzinə düşən braziliyalı oyunçu “Bakı”nın Avropadakı bombardiridi. Amma sonradan “Bakı”da qalmaq, oynamaq istəməyən forvard müxtəlif bəhanələr gətirib, məşqlərdən yayındı, intizamsızlıq etdi. O vaxt “Bakı”nın belə cah-cəlalı yox idi. Paytaxt klubu qamışların bitdiyi “Ədliyyə” stadionunda məşq edirdi. Artıq Avrokubok mövsümü bitmiş, “Bakı” da Tofiq Bəhramov adına Respublika Stadionundan çıxıb, ənənəvi olaraq “Ədliyyə”yə üz tutmuşdu. Almeyda isə oranı görüncə, sap-sağlam dizini tutub yerə yıxıldı və məşq etmədi. Məhz bundan sonra onunla “Bakı” arasında olan körpülər yandı. İntizamsızlığa başlayan forvard bu səbəbdən “Bakı”dan qovuldu.

Braziliyalı bəstəboy Jabanın Azərbaycana gəlişi böyük səs-küy yaratdı. Futbolçunu həmin vaxt ölkəmizə “Bakı”nın türkiyəli meneceri Tunc Afşar gətirmişdi. Jabanın transferi o dönəm üçün böyük keçid sayılırdı. Çünki Jaba Türkiyə Superliqasında yaxşı oyunlar keçirmiş, təcrübə və ad-san qazanmışdı.O, “Bakı” üçün də xeyirli oyunçu oldu. Onun ən başlıca problemi spirtli içki düşgünü olması idi. Hətta onu əvəzedici heyətə göndərdilər ki, bəlkə düzələr. Amma olmadı... Jaba “Bakı”dan göndərildi. Heç kimin gözləmədiyi halda Türkiyənin Superliqa klubu “Antalyaspor”la anlaşdı. Amma həmin klubda da günləri uzun çəkmədi və Mehmet Özdiləkin qərarı ilə klubdan qovuldu. İndi isə gününü birinci və ikinci liqa klublarında baxışdan keçməklə yola verir.

Azərbaycana gələn ən istedadlı oyunçulardan biri idi. Xüsusən də, standart vəziyyətlər və təkbətək mübarizə zamanı çox təhlükəli olurdu. Onunla bağlı bir hadisə hələ də xatırlanır. Müqədinin çıxış etdiyi “Olimpik” “Şəfa” stadionunda MOİK-lə münasibətlərini ayırd edirdi. Matçın sonlarında “Olimpik” penalti qazandı və topa həmişəki kimi, Bəşir yaxınlaşdı. Bəşir topa yaxınlaşdıqdan sonra “Olimpik”in baş məşqçisi Əsgər Abdullayev soyunub-geyinmə otağına getdi. Bəşir isə zərbəni dəqiq yerinə yetirib hesabı 3:0 etdikdən sonra hakim final fitini səsləndirdi. Mətbuat konfransında məsələyə aydınlıq gətirən Abdullayev addımını belə izah etdi: “Mən əmin idim ki, Müqədi zərbəni dəqiq yerinə yetirəcək”. Bəli, misirli oyunçu belə bir güvəni qazanmışdı. Amma etdiyi intizamsız hərəkətlər bu inamı yerə vururdu. Sonda hətta Azərbaycandan necə və kimin vasitəsilə çıxarıldığı da məlum olmadı. Onu da deyək ki, Bəşir “Olimpik”dən öncə “Karvan”ın uğurları üçün çalışmışdı.

“Xəzər Lənkəran”da çıxış edən yunanıstanlı hücumçunun nəyə qadir olduğunu müzakirə etmək artıqdır. Milli komandanın sabiq üzvü özü istəyəndə futbol oynayırdı, istəyəndə zədələnirdi, istəyəndə qol vururdu, istəyəndə boş qapını belə görmürdü. Bu tip oyunçular isə heç vaxt yaxşı xatirələrlə yadda qalmırlar. Sialmasın “Xəzər Lənkəran”lı günləri Azərbaycan Kubokunun finalından sonra başa çatdı. “Neftçi” ilə həlledici görüşdə penaltini dəqiq yerinə yetirə bilməyən yunan hücumçu dərhal klubdan qovuldu. Həmin vaxt “Xəzər Lənkəran”dan bildirmişdilər ki, Sialmas oyununa görə yox, məhz intizamsız hərəkətlərinə görə yola salınıb.

Həqiqətən də, Braziliya futboluna xas keyfiyyətləri özündə birləşdirən oyunçu idi. Azərbaycanda oynamadığı klub qalmadı. “Standard”dan başladı, “İnter”də davam etdi, “Bakı”da gün keçirdi və nəhayət, “Qarabağ”a üz tutdu. Roşanı hətta Qurban Qurbanov da düzəldə bilmədi. Öz oyunu ilə yanaşı, intizamsız hərəkətləri ilə də gündəmə gələn futbolçu Ağdam klubunun düşərgəsinə gec qoşuldu. Odur ki, onu klubdan qovdular. İllər keçsə də, bu futbolçu xatırlanacaq. Çox fərqli oyun stilinə malik idi. Lakin xarakteri onu məhv etdi.

Bojidar Bandoviçin “Bakı”ya sırıdığı oyunçulardan biri idi. Adamın Bandoviçə baş məşqçi deməyə də dili gəlmir. Yunanıstanda istədiyini etdikdən sonra Azərbaycana üz tutan Bandoviç ölkəmizdə də əməllərini həyata keçirdi. Heç kimə lazım olmayan futbolçuları Azərbaycana gətirib, yaxşı pullar qazandı, daha sonra kompensasiya alıb gətirdikləri ilə yanaşı, özü də “Bakı”dan getdi. Bandoviçin “Bakı”ya sırıdığı oyunçulardan biri də yunanıstanlı Vangelos Mantzios oldu. Heç nə ilə yadda qalmayan yunan daha sonra intizamsızlığı ilə gündəmə gəldi. “Bakı” rəhbərliyindən ciddi xəbərdarlıqlar alan yunanıstanlı forvard çıxış yolunu bazadan qaçmaqda gördü.

Ümumiyyətlə, “Qarabağ”ın baş məşqçisi Qurban Qurbanovun qapıçılarla bağlı mövqeyini başa düşmək olmur. Əvvəlcə Boyan Pavloviçi aradan götürən Qurbanov daha sonra Miro Varvodiçə “yaxşı yol” dedi. Halbuki, getməzdən öncə Avropa Liqasının bütün oyunlarında məhz qapını Miro qorumuşdu. Bəs necə oldu ki, Qurban Qurbanov onu göndərdi? Bunun futbolla heç bir əlaqəsi yoxdur. Qurban Qurbanov idmançıya yaraşmayan hərəkətlər edən, siqaret çəkib, hərdənbir də içki içən oyunçu ilə yola davam etməməyi məqsədəuyğun sayıb.

P.S. Əslində, belə hərəkətlər azərbaycanlı futbolçulara da yad deyil. İçki içən də var, siqaret çəkən də, futbolu qəlyan dumanında uçuran da.