Topaz Premyer Liqasında qış fasiləsinə sonuncu pillədə yollanan “Sumqayıt” yaxın günlərdə daha bir futbolçu ilə müqavilə bağlaya bilər. “Gənclik şəhəri” təmsilçisi millimizin sabiq üzvü Andrey Popoviçi heyətinə qatmaq üzrədi.
Apasport.az bildirir ki, bu barədə adının açıqlanmasını istəməyən türkiyəli menecerlərdən biri məlumat verib.
“Andreyi “Tavşanlı Linyitspor”a gətirsək də, burada karyerası çox uğursuz alındı. Onunla Azərbaycan klublarından biri maraqlanır. Həmin komanda hazırda turnir cədvəlində son pillədə qərarlaşıb” – deyə, mənbə bildirib.
Hazırda Türkiyədə I dəstə təmsilçisi “Tavşanlı Linyitspor”un şərəfini qoruyan Andrey də Azərbaycana qayıtmaqda maraqlıdı. Komandasının yarım mövsümdə keçirdiyi 21 görüşün yalnız birində meydan üzü görən Popoviç həmin oyunda da məhz kubokda forma geyinib.
Xatırladaq ki, Popoviç 2011/2012 mövsümündə də “Sumqayıt”ın şərəfini qoruyub.
Xəbərdən istifadə edərkən istinad etmək vacibdir.
