Bu gün səhər saatlarında velosiped meydanından start götürən "Tour d'Azerbaidjan-2014" veloyürüşünün iştirakçıları İsmayıllı şəhərində finiş xəttini keçiblər.

Trend-in məlumatına görə, Bakı velosiped parkından start götürən velosipedçilər 187 km fəth edərək İsmayıllı şəhərində Heydər Əliyev Mərkəzinin qarşısında finiş xəttini keçiblər. Uzun mübarizədən sonra finiş xəttini ilk keçən sloveniyalı idmançı Primoz Roqliç olub.

Ondan bir neçə saniyə geridə qalan avstraliyalı idmançı Uilyam Klark isə ikinci yeri tutub. Finiş xəttini üçüncü keçən isə italiyalı Rafael Andriato olub.

Qaliblər bir qədər dincəldikdən sonra mükafatlandırma mərasimi təşkil olunub. Səhnəyə ilk olaraq sloveniyalı idmançı P.Roqliç çıxıb. Göy köynəyin sahibi olan idmançıya İsmayıllı rayon İcra hakimiyyətinin başıçısı və Azərbaycan Velosiped İdmanı Federasiyasının vitse-prezidenti Sahib Ələkbərov tərəfindən mükafatlar təqdim olunub. Birinci yerin sahibindən sonra isə digər yerlərin qaliblərinə də mükafatlar verilib.

Mükafatlandırma mərasimindən sonra mətbuat konfransı keçirilib. Konfransda birinci və ikinci yerin sahibləri öz təəssüratlarını bölüşüblər.

Bakı-İsmayıllı yolunu birinci qət edən P.Roqliç yarış boyunca ilk dəfədir ki, birinci yerin sahibi olduğunu bildirib: "Yarış ərzində ilk dəfədir ki, birinci yerin sahibi oluram. Sevincimin həddi-hüdudu yoxdur. Bu sevinci bütün idmançı dostlarıma arzu edirəm".

İkinci yerin sahibi U.Klark da öz təəssüratlarını bölüşərək yarışmanın çox çətin olduğunu vurğulayıb: "Karyeram ərzində ikinci yer ən uğurlu nəticəmdir. Bu yerə çox çətinliklə nail oldum. Düzdür, birinci yer daha gözəldir, amma hazırkı nəticəm də pis deyil. Növbəti mərhələlərdə bu yeri qoruyub saxlayamağa çalışacağam".