32 turun müqayisəsi

Ötən həftə Topaz Premyer Liqasında 32-ci tur başa çatdı. Komandaların hazırkı vəziyyətini təhlil etmək baxımında 32 həftəlik marafon heç də az deyil. Ötən turların nə ilə yadda qaldığını üzə çıxarmağın ən yaxşı yolu müqayisə olduğundan ötən mövsümün müvafiq dönəminə nəzər salıb, ölkə çempionatında nəyin yaxşıya, nəyin pisə doğru dəyişdiyini aydınlaşdırmağa cəhd edəcəyik. Ötən “futbol ili”ndə ölkə birinciliyində 12 klub mübarizə apardığından və “altılıq” sistemi tətbiq olunduğundan 32-ci tur həm də Premyer Liqanın sonu demək idi. Bu dəfə isə dörd dövrəli system tətbiq olunduğundan elitadakı 10 komanda 36 matç keçirməklə mövsümü tamamlayacaq. Bu səbəbdən ötən birinciliyin yekunu ilə cari birinciliyin 32 turunu müqayisə etməliyik.

Müqayisə apararkən güclülər dəstəsində mübarizə aparan komandaların nəticələrinə ayrı-ayrılıqda diqqət yetirəcəyik. Amma əvvəlcə Topaz Premyer-Liqasındakı məhsuldarlıqdan bəhs edək. Ötən birinciliyin 32 turunda qapılara 468 qol vurulmuşdusa, bu dəfə komandalar ümumilikdə 383 dəfə fərqləniblər. Öncəki mövsümün ən çox qol vuran kollektivi olan “Neftçi” 59 qol sevinci yaşamışdısa, bu dəfə çempionatın lideri olan “Qarabağ”ın aktivində 61 qol var. Ən az top buraxan komandanın göstəricisində də müsbət irəlləyiş var. Belə ki, 2012/2013-cü illər mövsümünün ən az top buraxan komandası “İnter” 22 dəfə məyus olmuşdusa, indiki halda “Qarabağ”ın passivində 17 qol var.

Maraq doğuran digər məqam isə ən az top vuran və ən çox top buraxan komandaların müqayisəsidir. Əgər ötən mövsüm 32 turdan sonra ən az top vuran
komanda “Kəpəz” 23 dəfə fərqlənmişdisə, bu mövsüm 18 dəfə qol sevinci yaşayan “Rəvan” Gəncə klubunun gerisindədir. Ən çox top buraxan komandalar baxımından da “Kəpəz” və “Rəvan” fərqlənir. Müqayisə üçün deyək ki, ötən mövsüm “Kəpəz” 64 dəfə qapısında qol gprmüşdüsə, bu dəfə “Rəvan”ın passivində 57 top var.

“Qarabağ”:  Mövsümü qızıl medulla başa vurması gözlənilən Ağdam təmsilçisi ötən birincilikdən daha yaxşı göstəricilərə malikdir. Belə ki, ötən mövsüm 59 xalla ikinci olan Qurban Qurbanov komandası bu dəfə 68 xal yığmaqla nəticəsini yaxşılaşdırıb. Ümumilikdə paytaxt klubunun bütün göstəricilərində müsbət mənada fərqlər müşahidə olunur. Əgər çempionatın hazırkı lideri ötən “futbol ili”ndə 16 dəfə qələbə sevinci yaşamışdısa, cari mövsümdə qazanılan qələbələrin sayı 20-dir. Ötən birincilkdə 11, bu il isə 8 oyunda heç-heçə edən “köhlən atlar”ın məğlubiyyət sayı da 5-dən 4-də dəyişib. Vurulan və buraxılan topların sayında da komanda üçün ürəkaçan mənzərənin olduğunu qeyd etməliyik - 43:26-nın 61:17-yə olan nisbəti.

“İnter”: Geridə qalan 32 turdan sonra Topaz Premyer Liqasında ikinci pillədə olan “bankirlər”də ötən mövsümlə müqayisədə göstəricilərini yaxşılaşdıran komandalar sırasındadır. Belə ki, ötən biirincilikdə 57 xalla üçüncü pillədə olan Kaxaber Tsxadadzenin “drujinası” bu mövsüm üç xal daha artıq yığmaqla bir pillə irəlidə qərarlaşıb. Qələbə sayını 18-ə çatdıran “İnter”in 2012/2013-cü illər mövsümü ilə müqayisədə iki qələbə artıq qazanmaqla diqqət çəkir. Məğlubiyyət sayı 7-dən 8-ə olmaqla pisə doğru dəyişən paytaxt klubunun top fərqindəki göstəriciləri də müxtəlifdir. Daim praqmatik oyun üslubuna üstünlük verən “İnter”in ötən mövsümlə müqayisədə daha çox top vurmaqla yanaşı, daha çox qol buraxması diqqət çəkməyə bilməz. Məlumat üçün bildirək ki, “göy-ağlar” ötən birincilikdə 38 dəfə rəqib qapısına yol tapdığı halda, cari çempionatda 54 qol sevinci yaşamaqla diqqət çəkir. Buraxılan toplara gəlincə, ötən mövsümün 32 matçında 22 dəfə məyus olan “bankirlər” bu dəfə 22 dəfə topu torundan çıxarmalı olub.

“Neftçi”:  Ötən mövsümün müvafiq dövründə lider olmaqla qızıl medalları qazanan flaqmanın cari çempionatın müvafiq dönəmində əvvəlkindən 7 xal az (55) yığmaqla üçüncü sırada olması qeyd olunmalıdır. Ümumilikdə paytaxt klubunun bütün göstəricilərində geriləmə müşahidə olunur. Əgər paytaxt təmsilçisi ötən mövsüm 32 oyunda 19 qələbə qazanmışdısa, bu dəfə 16 dəfə qələbəni bayram edə bilib. Komandanın məğlubiyyətlərinin sayına gəlincə, ötən il 32 oyundan sonra 8 dəfə uduzan son çempion bu ilin müvafiq dövründə 9 dəfə meydanı məğlub tərk edib. Vurulan və buraxılan topların sayında da komanda üçün xoşagəlməz mənzərənin olduğunu qeyd etməliyik. Belə ki, ötən mövsümün analoji dövründə 59 top vuran 32 qol buraxan “ağ-qaralar” cari çempionatda isə 14 qol daha az vurmaqla yanaşı, 7-sini daha artıq buraxıb.

“Qəbələ”: Cari çempionatın 32 turundan sonra dördüncü sırada yer alan əyalət klubu bu mövsüm ötənilkindən 13 xal daha artıq (51) toplamaqla iki pillə daha yuxarıda qərarlaşıb. Cari birincilikdə bütün göstəricilərini yaxşılaşdıran Yuri Syominin komandası ötən mövsüm 10 qələbə qazanmışdısa, bu dəfə 15 dəfə meydanı üç xalla tərk edib. Məğlubiyyət sayına gəlincə, ötən “futbol ili”ndə 14 matçda məğlub olan “qırmızı-qaralar” bu dəfə 11 oyunda uduzub. Top fərqində də müsbət dəyişikliklər müşahidə olunan Qəbələnin eyniadlı komandası ötən mövsüm 32 dəfə qol sevinci yaşamışdısa, bu dəfə 8 top daha artıq vurub. Buraxılan qollarda isə keçən “futbol ili”ndəki göstərici 40 olduğu halda hazırda həmin göstərici 33-dür ki, bu da 7 top daha az deməkdir.

“Bakı”: Hazırda turnir cədvəlinin 5-ci pilləsində olan Miliko Pantiçin komandasının ötən mövsümün analoji dövrü ilə  müqayisədə sıralamadakı yeri dəyişməsə də, əksər göstəricilərdə müsbət dəyişiklik gözə dəyir. Belə ki, ötən mövsümün müvafiq dövründə 9 qələbə və 14 heç-heçə sayəsində aktivinə 41 xal yazdıran “zolaqlılar” cari mövsümdə isə 14 qələbə və 8 bərabərlik nəticəsində 50 xala sahibdir. Daha bir diqqətçəkən məqam isə “Bakı”nın cari çempionatda daha çox fərqlənməsidir. Belə ki, ötən “futbol ili”ndə rəqib qapısına 33 dəfə yol tapan sözügedən kollektiv bu il 48 qola sevinib. 2012/2013-cü illər mövsümü ilə müqayisədə “Bakı” üçün xoşagəlməz mənzərə isə məğlubiyyət sayının 9-dan 10-a, buraxılan topların isə 27-dən 38-ə dəyişməsidir.

“Simurq”: Cari mövsümün 32 turunun ardından 6-cı pillədə olan Zaqatala klubu ötən mövsmün müvafiq dövründə isə 4-cü sırada idi. Ötən mövsüm 12 qələbə və 12 heç-heçə sayəsində 48 xal toplayan “sarı-qaralar” cari mövsümdə isə 11 qələbə 10 bərabərlik nəticəsində aktivinə 43 xal yazdırıb. “Simurq” komadası üçün bu mövsüm yaxşıya doğru dəyişən yeganə məqam isə Georgi Çixradzenin “drujinası”nın daha çox top vurması və daha az top buraxmasıdır. Belə ki, ötən birincilikdə 32 qol vuran və 26 top buraxan zaqatalalılar cari çempionatda isə 33 qol sevinci yaşadığı halda, 25 dəfə topu torundan çıxarmalı olub.

“Xəzər Lənkəran”:  Bu mövsüm yaranmasının 10 illiyini qeyd edən və mövsümə çempionluq iddiası ilə başlayan Lənkəran təmsilçisi nəinki çempionluq hədəfinə çatdı, heç ötən mövsümün analoji dövründəki nəticələrini də təkrar edə bilmədi. Ötən mövsümkündən bir qələbə az qazanan “ağ-yaşıllar” bir xal da az yığmaqla diqqət çəkir. Komandanın məğlubiyyət sayında müsbət dəyişiklik olsa da, top fərqində geriləmə sezilir. Belə ki, ötən “futbol ili”ndə 40 top vuran və 37 dəfə məyus olan “Xəzər Lənkəran” cari birincilikdə isə 32 dəfə qol sevinci yaşadığı halda, 45 dəfə topu torundan çıxarmalı olub.

AZAL: Paytaxt təmsilçisinin 32 turluq çıxışını müqayisə edərkən “təyyarəçilər”in ötən il daha yaxşı çıxış etdiyi görünür. Hər halda, AZAL-ın ötən mövsümün analoji dövründə indikindən 28 xal daha artıq yığması hər şeyi ortaya qoyur. Ötən mövsüm 16 qələbə və 9 heç-heçə edən AZAL-ın cari mövsümdə isə 6 qələbə və 11 bərabərliklə yadda qalması çox şeydən xəbər verir.

“Sumqayıt”: Ötən mövsümün müvafiq dövrü ilə müqayisədə zəif çıxış edən kollektivlərdən olan “Gənclik şəhəri”nin komandası öncəki “futbol ili”ndə 35 xal yığdığı halda,cari çempionatın 32 turunun ardından 22 xal toplayıb. 2012/2013-cü illər mövsümündə 9 qələbə qazanan və 8 heç-heçə edən “Sumqayıt” cari çempionatda isə 4 qələbə və 10 bərabərlik əldə edib. Komandanın məğlubiyyət sayı isə pisə doğru dəyişib. Belə ki, ötən mövsüm 15 dəfə uduzan “kimyaçılar” cari birincilikdə isə 18 oyunda meydanı xalsız tərk edib.

“Rəvan”: Cari mövsümün 32 turundan sonra sonuncu pillədə olan paytaxt klubu ötən çempionatda isə daha qənaətbəxş nəticələr qazanmışdı. Belə ki, ötən mövsümü 8-ci pillədə tamamlayan “uçan asalanlar” 40 xal toplamışdısa, bu il 32 matçdan sonra 19 xal yığmaq mümkün olub. Ötən mövsümün 32 qarşılaşmasının tən yarısında xal qazanan “Rəvan” cari birincilikdə isə 3 qələbə və 10 heç-heçə olmaqla cəmi 13 oyunda xal ehtiyatını artıra bilib ki, bu da sonuncu pilləni tərk etməyə kifayət etməyib.

Sonda isə ötən mövsümün yekun turnir cədvəli ilə cari çempionatın 32 turundan sonrakı turnir cədvəlini təqdim edirik. Ötən “futbol ili”ndə elitada yer alan “Turan” və “Kəpəz” cari birincilikdə yüksək dəstədə olmadığından aşağıdakı cədvəldə sözügedən iki komandanın nəticələri əks olunmayıb.

2013/14 mövsümü

32 turdan sonra

2012/13 mövsümü

Yekun cədvəli

Qeyd: Ötən mövsüm “altılıq” sistemi tətbiq olunduğundan komandaların həlledici mərhələdə qazandığı xallar yalnız klubların yer aldığı “altılıq”da mövqe dəyişikliyinə səbəb olurdu.

Tural Məmmədov