Azərbaycan Respublikasının Prezidenti yanında Gənclər Fondunun maliyyə, şəhər Gənclər və İdman Baş İdarəsinin və 3 saylı Uşaq - Gənclər İdman Şahmat - Dama məktəbinin təşkilati dəstəyi ilə 29 iyun 2014-cü ildə Sumqayıt şəhərində şahmat festivalı keçirilib.

Festivalı giriş sözü ilə açan layihə rəhbəri Anar Qasımov əsası Ümummilli Lider Heydər Əliyev tərəfindən qoyulan və cənab prezident İlham Əliyev tərəfindən uğurla davam etdirilən dövlət gənclər siyasətindən və ölkəmizdə yeniyetmə və gənclərə göstərilən diqqət və qayğıdan söz açıb.

Daha sonra festivalım keçirilməsinin məqsəd, vəzifə və gözlənilən nəticələrindən danışan layihə rəhbəri yarışın məqsədinin “2009-2014-cü illərdə 

Azərbaycanda şahmatın inkişaf etdirilməsi Dövlət Proqramı”na dəstək olmaq, yeniyetmə və gənclər arasında şahmat oyununa marağı artırmaq, bu oyunun gənclərin ixtiraçılıq qabiliyyətini və qanunauyğunluq təfəkkürünün inkişaf etdirilməsinə müsbət təsir edə biləcəyini onlara mənimsətmək, 2015-ci ildə şahmat üzrə Dünya Kuboku yarışı və 2016-ci ildə 42-ci Ümumdünya Şahmat Olimpiadasının vətənimizdə keçirilməsi haqqında gəncləri maarifləndirmək olduğunu qeyd edib

3 saylı Uşaq - Gənclər İdman Şahmat - Dama məktəbinin məşqçi – müəllimi Q. Balacayevin baş hakimliyi ilə “Dirəvi” sistem üzrə 40 nəfər iştirakçı arasında keçirilən və 8 – saata yaxın davam edən gərgin mübarizənin sonunda 1-ci dərəcəli şahmatçılar Əzizov Kamal Yaşar oğlu I-yerə, Əzizova Şəhla Yaşar qızı II-yerə və Quliyev Əli Muxtar oğlu isə III-yerə layiq görülmüşlər. Qaliblərə medal, sertifikat və müxtəlif hədiyyələr təqdim edilib.

Ümumilikdə isə festival iştirakçılarının hər birinə sertifikat və bukletlər, papaq və köynəklər paylanılmış, fasilə zamanı isə iştirakçılara çay, qəhvə və şirniyyat süfrəsi təşkil olunub.

Layihədə qonaq qismində iştirak edən şəhər Gənclər və İdman Baş İdarəsinin əməkdaşı C.Hüseynov, Sumqayıt Dövlət Universitetinin tələbə-gənclər təşkilatının, STİ – nin nümayəndələri və 31 saylı tam orta məktəbin müəllimləri çıxış edərək dövlət başçımızın idmana diqqəti sayəsində Azərbaycanın artıq idman ölkəsi kimi bütün dünyada layiqli yer tutuğunu, müstəqil Azərbaycanın idmançılarının dünya miqyasında böyük uğurlar qazandığını, ölkəmizin dünya idman ailəsinə möhtəşəm mərkəz kimi daxil olmasını fərəh hissi ilə qeyd ediblər.