27 avqust 2014-cü il tarixində «Kapital Bank» Açıq Səhmdar Cəmiyyəti ilə "Sumqayıt" Futbol Klubu arasında əməkdaşlıq müqaviləsi imzalanıb. Müqaviləyə uyğun olaraq, Azərbaycan Respublikası Dövlət Neft Şirkəti tərəfindən inşa olunmuş yeni kompleks 1 il müddətində“Kapital Bank Arena” adlanacaq. Bu müddətdə Bank stadionda özünün reklam materiallarının yerləşdirilməsində müstəsna hüquqlara malikdir.

Bu münasibətlə keçirilən mətbuat konfransında "Sumqayıt" Futbol Klubunun prezidenti Kamran Quliyev Kapital Bankla tərəfdaşlıq müqaviləsi barədə jurnalistlərə ümumi məlumat verib.

Daha sonra “Kapital Bank” ASC-nin İdarə Heyəti sədrinin I müavini Fərid Məmmədov çıxış edərək Kapital Bankın sosial məsuliyyət layihələrində idmana dəstəyin mühüm yer tutduğunu, ona görə Bankın "Sumqayıt" Futbol Klubunun fəaliyyətinə böyük məmnuniyyətlə dəstək verdiyini bildirib.

F.Məmmədov populyar idman növü olaraq, futbolun Sumqayıtda zəngin tarixi ənənələrə malik olduğunu diqqətə çatdırıb. Sumqayıt şəhərində öz şəraitinə, müasir standartlara cavab verən “Kapital Bank Arena” adlanmasının ümumilikdə Azərbaycan futbolunun inkişafına xoş bir töhfə olacağına əminliyini ifadə edib.

Bildirib ki, bu, Kapital Bankın "Sumqayıt" Futbol Klubu ilə sonuncu işbirliyi deyil: “Klubun Sumqayıt şəhər məktəblərində sağlam həyatın təbliği məramı ilə həyata keçirilməsini nəzərdə tutduğu layihələrdə də Kapital Bank yaxından iştirakı qərarlaşdırıb” deyə F.Məmmədov qeyd edib.

Ardınca jurnalistlərin sualları cavablandırılıb və Sumqayıt Futbol Klubu adından Kapital Banka rəmzi idman geyimi hədiyyə edilib. Sonda tədbir iştirakçıları stadionla tanış olublar.