Topaz Premyer Liqasının I turundakı "Sumqayıt" - "Qarabağ" oyununda rüsvayçılıq yaşanıb. 

 Belə ki, "Qarabağ"ın heyətində 69-cu dəqiqədə Riçard Almeyda Namiq Yusifovun əvəzində meydana daxil oldu. Halbuki, həmin vaxt meydanda 6 legioner futbolçu olduğundan, baş məşqçi Qurban Qurbanov yeni legioneri meydandakılardan birinin əvəzində meydana buraxa bilərdi. Amma braziliyalı futbolçunun məhz Namiqi əvəzləməsi səbəbindən limit pozlulub. O, məşqçilər korpusunun səhlənkarlığı ucbatından hətta sonadək meydanda olub.

Buna görə, 3-0 qələbə qazanan "Qarabağ"a texniki məğlubiyyət veriləcək.

Qurban Qurbanov da yol verilən səhvə görə alacaqları cəzaya etiraz etməyəcəklərini, bunun yalnız texniki yanlışlıq olduğunu qeyd edib. O, öz facebook səhifəsində bunları yazıb:

"Bu gün Azərbaycan Premyer Liqasının açılış turu idi. Oyunun 59-cu dəqiqəsində oyunçu dəyişikliyi yerinə yetirən zaman texniki səhv baş verdi. Beləki ilk olaraq Namiq Yusifovun əvəzinə Meydana Riçard Almeyda daxil oldu. Meydanda sayca maksimum 6 legioner ola biləcəyini nəzərə alsaq texniki səhv etmiş olduğumuzu anladıq. Oyundan dərhal sonra baş vermiş hadisəni məşqçilər korpusu olaraq müzakirə etdik və səhv etdiyimizi anladıq. İlk olaraq Muaremin əvəzinə Namiq Ələsgərov daxil olmalı idi. Amma Namiq Yusifun əvəzinə Riçard Almeyda daxil oldu.Oyun zamanı baş verən səhvimizi anlayır və PFL tərəfindən verilə biləcək cəzanı anlayışla qarşılayacağımızı bildirirəm".

(Virtualaz.org)