"Keşlə"nin Avroliqaya düşmək üçün son imkanıdır. "Sumqayıt"ın isə daha bir şansı var. Premyer Liqada 3-cü yeri turub, avrokuboklara vəsiqə qazana bilər".
Xeberle.com xəbər verir ki, bu sözləri qol.az-a açıqlamasında "Kəpəz"in sabiq baş məşqçisi Şahin Diniyev deyib.
Ölkə kubokunun yarımfinal mərhələsində bu gün keçiriləcək oyunları dəyərləndirən mütəxəssis əvvəlcə "Keşlə" - "Sumqayıt" matçı barədə fikirlərini açıqlayıb. Diniyevin fikrincə, Samir Abasovun komandası nisbətən şanslı görünsə də, iki görüşün nəticəsində hər şey ola bilər:
"Kubok oyunları elədir ki, orada baxımlı futbol görmək çox çətindir. İki oyunluq sistem olduğundan hər biri evdə və səfərdə vurulan qolları nəzərə alacaqlar, ehtiyatlı oynayacaqlar. Ev komandası top buraxmamağa, səfər komandası isə qol vurmağa çalışacaq. Bu gün kağız üzərində "Sumqayıt"ın şansı çoxdur. Amma məsələ 2-ci oyunda həll olunacaq. Birinci matçda nəyin necə olacağını bilmək olmaz. Çempionlar Liqasında da gördük ki, futbolda hər şey mümkündür. Finala çıxmaq baxımından vurulan qollar mühim rol oynayacaq. Şanslar 51-in 49 faizə "Sumqayıt"ın xeyirinə olsa da, kubok oyunlarında hər şey bərabərləşir. Nəzərə alsaq ki, "Keşlə"nin axırıncı şansıdır, daha aqressiv və istəkli oynayacaqlar".
Təcrübəli mütəxəssis günün ikinci matçı olan "Qəbələ" - "Neftçi" oyununa da toxunub. Diniyev bu cütlükdə də şansların bərabər olduğunu söyləyib: "Turnir cədvəlinə baxsaq, "Qəbələ" "Neftçi"dən öndədir. Amma son oyunları yada salanda "Neftçi"nin göstəriciləri daha yaxşıdır. "Qəbələ"nin fasilədən sonra qeyri-sabit çıxışı, "Neftçi"nin isə yaxşı təsir bağışlaması şansları bərabərləşdirir. Məncə, birinci oyunlar heç nəyi həll etməyəcək. Bütün suallara cavab matçlarında aydınlıq gələcək".
Diniyev finala çıxa biləcək komandalarla bağlı proqnozunu da açıqlayıb: "Yenə deyirəm, son oyunlara baxanda, "Sumqayıt"la "Neftçi"nin finala çıxacağını gözləmək olar. Amma kubok matçlarında şanslar adətən bərabər olur. Ona görə də 4 komandadan hər biri final oynamağa iddialıdır".
Xəbərdən istifadə edərkən istinad etmək vacibdir.
