Topaz Premyer Liqanın "Zirə" ilə 1-ci turundan təxirə salınmış oyununda zədələnən "Qarabağ"ın yarımmüdafiəçisi Donald Geryenin son durumuna aydınlıq gəlib.
Xeberle.com xəbər verir ki, klubun mətbuat xidmətinin rəhbəri Nurlan İbrahimovun Qol.az-a verdiyi məlumata görə, bu gün MRT (Maqnit Rezonans Tomoqrafiyası) müayinəsindən keçən haitili futbolçunun bazu sümüyünün çıxdığı məlum olub. N. İbrahimov bildirib ki, 29 yaşlı oyunçu təxminən 3 həftə yaşıl meydanlardan kənarda qalacaq.
Bu isə o deməkdir ki, Gerye sentyabrın 29-da Topaz Premyer Liqanın 6-cı turunun "Sabah"la səfər və oktyabrın 4-də Avropa Liqasının qrup mərhələsinin 2-ci turunun "Arsenal"la ev oyununda forma geyinə bilməyəcək.
Qeyd edək ki, təcrübəli yarımmüdafiəçi "Zirə" ilə matçın 33-cü dəqiqəsində zədələnərək. yerini Ansi Aqolliyə buraxmışdı.
Xəbərdən istifadə edərkən istinad etmək vacibdir.
