Sovetlər dövründə idmanla məşğul olmaq üçün Respublikada əhəmiyyətli dərəcədə maddi-texniki baza yaradılaraq,  peşəkar məşqçi və idmançılar yetişdirilmişdi, idman məşqələləri ali və orta məktəb proqramlarına daxil edilərək, bədən tərbiyəsi və idmanın təbliğinə informasiya vasitələrində geniş yer verilmişdi. İdman bölmələrinə qeydiyyat pulsuz və ya simvolik ödəmələrlə aparılırdı. 

SSRİ-nin dağılmasından sonrakı böhran illərində Azərbaycanın bütün idman-sağlamlıq sahələri dövlət hamiliyi və maliyyəsindən məhrum oldu ki, bu da idman kompleksləri və idman qurğularının vəziyyətinə böyük zərər vurdu.

Müstəqillik əldə etdikdən sonra  isə artıq dövlət tərəfindən qərarların qəbul edilməsi və tədbirlərin keçirilməsi bizim ölkədə bədən tərbiyəsi və idmanın kütləvi inkişafına şərait yaratdı. 

İdman respublika əhalisi arasında hazırda  geniş yayılmış məşğuliyyət olmaqda davam edir. Şəhərimizdə də bir çox müasir tipli və dövrün tələblərinə cavab verən idman kompleksləri və məktəbləri yaradılaraq əhalinin istifadəsinə verilib. Lakin həmin idman məktəblərindəki qiymətlər hər kəsin büdcəsinə görə deyil. Normal şəraitli idman qurğusunda peşəkar məşqçidən dərs almaq istəyiniz sizin üçün bir az bahalı ola bilər. Amma nə dərəcədə? Elə bu məqsədlə də Xeberle.com olaraq Sumqayıtda fəaliyyət göstərən Olimpiya kompleksində, həmçinin gənclər idman məktəblərində xidmət göstərilən idman növləri və güzəşt kotiqoriyaları haqda qısa araşdırma apardıq.      

Sumqayıt şəhər Olimpiya Kompleksindən portalımıza bildirildi ki,  bütün olimpiya idman növləri üzrə kompleksdə ödənişsiz şərtlərlə məşqlər təşkil olunur. Daha dəqiq desək, futbol, güləş, boks, ağır atletika, boks, taekvondo, velosiped, bədii gimnastika, cudo idman növləri üzrə şəhid ailələri və qarabağ əlillərinin üzvləri güzəştli və bu idman növləri üzrə olimpiada iştirakçıları isə tam ödənişsiz şərtlərlə məşqlərə qatıla bilərlər.

Şəhərdə fəaliyyət göstərən 2 saylı Uşaq Gənclər İdman Məktəbindən isə Xeberle.com-a bildirildi ki, bütün idman növləri üzrə məşqlər ödənişsizdir.

Yeri gəlmişkən, xəbəri olmayanlar üçün məlumat verək ki, 1 sayli İdman məktəbi ilə 2 saylı idman məktəbi Təhsil Nazirliyinin qərarı ilə birləşdirilərək yeni  Sumqayıt şəhər ixtisaslaşmış Olimpiya  Ehtiyatları Şahmat məktəbi statusunu alıb. Daha ətraflı məlumat almaq üçün məktəbin direktoru, XXVIII Yay Olimpiya Oyunlarında bürünc medalçısı Fuad Aslanovla əlaqə saxladıq. Onun sözlərinə görə, SSRİ dövründən indiyə qədər Sumqayıt şəhərində heç bir məktəb bu statusu  almamışdır: "1 saylı ixtisaslaşmış Olimpiya Etiyatları Uşaq Gənclər İdman Şahmat məktəbi adının bizim məktəbə verilməsi ilə bütün işçilərimizin, o cümlədən də  müəllimlərimizin maaşı 15 faiz artıb. Bütün bunlar hər biri öz növbəsində bizim inkişafımız üçün stimuldur. Bu yaxınlarda Avropa birinciliyində iştrak etdik. Rusiyanın Anapa şəhərində keçirilən yarışda idmançımız qızıl medala layiq görüldü. Ümumilikdə isə  ödənişsiz olmaqla 14 idman növü üzrə təlimlər keçirilir.”