"UEFA Avropa Liqasının finalçılarına, yəni "Arsenal” və "Çelsi” klublarına ayrı-ayrılıqda 6000 bilet ayrılmışdı. "Arsenal” artıq bu biletlərdən 4500-nü reallaşdırıb, öz azerkeşlərinə satıb, "Çelsi” isə 3500-nü reallaşdırıb. Ümumilikdə 4500 bilet qalıb".
Xeberle.com xəbər verir ki, bunu Azərbaycan Futbol Federasiyaları Assosiasiyasının (AFFA) mətbuat və ictimaiyyətlə əlaqələr şöbəsinin müdiri Firuz Abdullayev İngilis mətbuatında "Arsenal" və "Çelsi" komandalarının Bakıdakı Avropa Liqasının final oyunu üçün biletlərdən imtina etməsinə dair iddialara münasibət bildirərkən deyib.
O, qeyd edib: "Oyuna az müddət qaldığına görə, AFFA UEFA-ya həmin biletlərin Azərbaycan sakinlərinə satılması üçün müraciət etdi. Bizə hər gün çoxlu sorğu gəlir və oyunu izləmək istəyənlərin sayı üstünlük təşkil edir. Biz həmin 4500 bileti UEFA-dan götürdük və dünəndən Bakıda kassalarda biletlərin satışına başlamışıq. İngiltərə mətbuatında son günlər Azərbaycanla bağlı neqativ yazılar dərc olunmaqdadır. Bu məlumat da həmin kampaniyanın bir hissəsidir. Bizim dediyimiz rəqəmlər AFFA-nın UEFA-dan aldığı rəsmi məlumatdır” - deyə F.Abdullayev əlavə edib.
Xəbərdən istifadə edərkən istinad etmək vacibdir.
