Azərbaycan Respublikası Gənclər Fondunun maliyyə dəstəyi, "Sağlam Düşüncə” Gənclər Təşkilatının təşkilatçılığı və Respublika Olimpiya Velosiped Məktəbinin tərəfdaşlığı ilə baş tutan veloyürüşdə 60 nəfərdən çox gənc Sumqayıt şəhərində pedal çevirib.  

Həvəskar velosipedçilərin şəhər turu gənclər təşkilatının "Tütünsüz Cəmiyyət” adlı layihəsinin açılış tədbiri olaraq təşkil edilib. Layihə rəhbəri Əminə Abdullayevanın, Sumqayıt şəhər Gənclər və İdman Baş İdarəsinin rəsi Elgün Hümbətovun və Respublika Olimpiya Velosiped Məktəbinin direktor müavini Cavid Allahverdiyevin açılış nitqindən sonra iştirakçılar yürüş üçün təlimatlandırılmışdır.  Yerli əhalinin diqqətini sağlam həyat tərzinin fəal tətbiqinə çəkməyi hədəfləmiş velosipedçilər "Tütünə Yox” şüarı əks olunmuş köynəklərlə aksiyanın ideyasını təbliğ edərək Sumqayıt şəhər Heydər Əliyev Mərkəzinin qarşısından start götürüb və 15 km məsafə qət edərək Nəsimi Parkında yürüşü yekunlaşdırıblar. Bununla onlar yerli sakinlər üçün səmərəli məşğuliyyətləri, tütünlə mübarizədə gənclərin birliyini nümayiş etdiriblər.