Bu gün Sumqayıtda şəhər İcra hakimiyyətinin təşəbbüsü, Gənclər və İdman Baş İdarəsinin təşkilatçılığı ilə məhəllə və mikrorayonlar arasında sayca 4-cü ənənəvi kross yarışı keçirilib. İdarədən Xeberle.com-a verilən məlumata görə, ümummilli lider Heydər Əliyevin abidəsi önündə bədii açılış mərasimi ilə başlayan tədbirdə şəhərin ayrı-ayrı məhəllə və mikrorayonlarından 300-dən artıq həvəskar idmançı iştirak edib.

Tədbirin açılış mərasimində ümummilli lider Heydər Əliyev tərəfindən əsası qoyulan, hazırda isə prezident İlham Əliyev tərəfindən uğurla davam etdirilən dövlət siyasəti nəticəsində bütün sahələrə olduğu kimi idmana da xüsusi diqqət və qayğı göstərildiyi, gənc nəslin fiziki və mənəvi inkişafına həmişə prioritet məsələ kimi yanaşıldığı qeyd olunub.

Şəhər rəhbərliyi, idarə və müəssisə rəhbərləri, ictimaiyyət nümayəndələri və ümumilikdə 10 000-dən artıq tamaşaçının izlədiyi tədbir həmişə olduğu kimi bu dəfə də böyük maraqla qarşılanıb.

Yarışda Əlirza Əlirzayev I yeri, Fərid Paşayev və Abbas Abbasov isə müvafiq olaraq, II və III yerləri tutublar.

Sumqayıt şəhər İcra hakimiyyəti başçısının müavini Elgin Həbibullayev və Sumqayıt şəhər Gənclər və İdman Baş İdarəsinin rəisi Elşən Baxşəliyev tərəfindən I-X yerləri tutan idmançılara medal, fəxri fərman və xatirə hədiyyələri təqdim olunub.

Xeberle.com