Gənclər və İdman Nazirliyi, Təhsil Nazirliyi və Azərbaycan İdman Könüllüləri İctimai Birliyinin "Çempionumuz” sosial idman layihəsi çərçivəsində Sumqayıtda növbəti görüş keçirilib.
Xeberle.com xəbər verir ki, Sumqayıt şəhər Gənclər və İdman Baş İdarəsinin təşkilatçılığı ilə 15 fevral 2022-ci il tarixində 9 nömrəli tam orta məktəbin akt zalında "Şöhrət” ordenli, Azərbaycan Respublikasının Əməkdar İdman Ustası, Boks üzrə dünya çempionatının və Bakı I Avropa Oyunlarının qalibi, Avropa çempionatlarının gümüş və bürünc mükafatçısı London və Rio-de-Janeyroda keçirilən Yay Olimpiya Oyunlarının iştirakçısı Elvin Məmişzadə ilə görüş keçirilmişdir. Görüş zamanı ilk öncə qonaqlar məktəbin foyesində Qarabağ Müharibəsi şəhidlərini xatirəsini əks etdirən şəkillərə baxış keçirmişlər. Azərbaycan Respublikasının dövlət himni səslənmiş, ölkəmizin bütövlüyü uğrunda canından keçmiş şəhidlərimizin xatirəsi bir dəqiqəlik sükutla yad edilmişdir.
9 saylı tam orta məktəbin direktoru Tərlanə Nağıyeva qonaqları və tədbir iştirakçılarını salamladıqdan sonra çıxış edən Gənclər və İdman Baş İdarəsinin rəisi Elgün Hümbətov, tədbirin əsas mahiyyətinin gənclər arasında sağlam həyat tərzinin təbliği, yeni nəslin sağlamlığının qorunması, onların narkotik maddələr və psixatrop vasitələrdən uzaq olması, sağlam gəncliyin formalaşması, yeniyetmə və gənclərin düzgün həyat tərzinin aşılanması olduğunu bildirmişdir.
Elvin Məmişzadə şagirdlərə öz tövsiyyə və arzularını bildirdikdən sonra onların suallarını cavablandırmış, sonra xatirə şəkilləri çəkdirilmişdir.
Xəbərdən istifadə edərkən istinad etmək vacibdir.
